Ndërsa temperaturat bien dhe ditët shkurtohen, shumë njerëz ndihen më të lodhur, më pa energji dhe shpesh në humor të keq pa ndonjë arsye të dukshme. Ekspertët thonë se kjo është një reagim natyral i trupit ndaj ndryshimit të stinëve dhe ka shpjegim të qartë shkencor.
Si ndikon moti i ftohtë në humorin tonë?
Kur ekspozimi ndaj diellit zvogëlohet, trupi përjeton ndryshime hormonale që ndikojnë drejtpërdrejt në gjendjen emocionale. Mungesa e dritës ul prodhimin e serotoninës, hormonit që rregullon humorin dhe ndjenjën e mirëqenies, ndërsa rrit nivelin e melatoninës, hormonit që shkakton përgjumje.
Kjo përzierje e sjelljes hormonale është arsyeja pse shumë persona përjetojnë “depresion sezonal” ose trishtimin e dimrit, që zakonisht shfaqet në muajt e ftohtë e të errët.
Shenjat që tregon se moti po ndikon te ju, ekspertët vërejnë disa simptoma tipike:
-Ndiheni të trishtuar pa ndonjë arsye të veçantë
-Keni më pak energji dhe përqendrim
-Flini më shumë se zakonisht
-Humbni interesin për aktivitetet që ju pëlqenin më parë
-Keni dëshirë të shtuar për ëmbëlsira apo karbohidrate
Këto janë shenja që trupi po përshtatet me mungesën e dritës dhe ritmin më të ngadaltë të ditëve dimërore.
Si ta përmirësoni humorin në ditët e ftohta?
Specialistët këshillojnë disa mënyra të thjeshta për ta mbajtur shpirtin lart gjatë dimrit:
-Dilni çdo ditë në dritë natyrale, edhe për pak minuta.
-Bëni aktivitet fizik, pasi ai rrit prodhimin e serotoninës.
-Mbani një orar të rregullt gjumi.
-Konsumoni ushqime të pasura me vitaminë D dhe omega-3.
-Krijoni kontakt social – edhe një takim i shkurtër me miqtë mund të ndryshojë gjendjen tuaj emocionale.
Në raste të zgjatura, mjekët mund të rekomandojnë terapi me dritë ose këshillim psikologjik.
Edhe pse moti i ftohtë dhe errësira e dimrit ndikojnë në trup e mendje, ndryshimet e vogla në stilin e jetesës mund të ndihmojnë që të ruani ekuilibrin emocional dhe energjinë, edhe në ditët më të ngrysura.
