Sot vendi ynë ndikohet nga kushte atmosferike të paqëndrueshme. Qielli mbulohet nga vranësira mesatare deri të dendura, ndërsa në orët e mesditës ka intervale të shkurtra me kthjellime, duke sjellë momente me diell.
Sipas Shërbimit Meteorologjik Ushtarak, reshjet e shiut janë prezente që prej orëve të para të ditës, me intensitet të ulët deri mesatar në pjesën më të madhe të territorit.
Në qendër dhe jug, reshjet bëhen më të forta, shpeshherë në formën e shtrëngatave dhe lokalisht të shoqëruara me breshër.
Gjatë ditës, reshjet vazhdojnë herë pas here, duke ruajtur intensitet të ulët në shumicën e zonave, ndërsa në perëndim dhe veri ka periudha me shira më të dendur dhe shtrëngata afatshkurtra.
Në zonën e Alpeve, reshjet janë në formë bore me intensitet mesatar, ndërsa në relievet malore të verilindjes, lindjes dhe juglindjes, mbi lartësitë 1000–1100 metra, nuk mungojnë reshje bore të lehta.
Era fryn nga juglindja–jugperëndimi, me shpejtësi mesatare rreth 7 m/s, por përgjatë vijës bregdetare dhe në zonat luginore arrin deri në 16 m/s. Deti është i trazuar, me forcë valëzimi 4-5 ballë.
Autoritetet e Shërbimit Meteorologjik Ushtarak (SHMU) këshillojnë qytetarët të ndjekin përditësimet e radhës për të pasur informacion sa më të saktë mbi kushtet atmosferike.
