Jo të gjitha plagët janë fizike – disa prej tyre mbeten të padukshme, por ndikojnë thellësisht në jetën tonë. Kjo është veçanërisht e vërtetë për ata që janë rritur nën hijen e një prindi narcisist.
Sipas psikologëve të njohur Wendy Behary dhe Dr. Craig Malkin, ky lloj abuzimi emocional lë pas gjurmë të thella që shfaqen në mënyrën si individët ndërtojnë marrëdhënie, përjetojnë dashurinë apo e kuptojnë veten.
Ekspertët shpjegojnë se disa nga shenjat më të zakonshme përfshijnë vështirësinë për të vendosur kufij, ndjesinë e fajit kur thua “jo”, prirjen për të kënaqur të tjerët në dëm të vetes, një ndjesi të vazhdueshme se nuk je mjaftueshëm i mirë për të merituar dashuri, dhe shpeshherë një mungesë të theksuar të identitetit personal.
Fëmijët e rritur në mjedise të tilla shpesh shtypin ndjenjat dhe nevojat e tyre për të fituar miratimin e prindit
-thotë Dr. Malkin.
Ata mësohen të besojnë se janë “të tepërt”, “të ndjeshëm” apo “të pavlefshëm” nëse nuk përmbushin pritshmëritë e të tjerëve.
Sipas specialistëve, ndërgjegjësimi është hapi i parë drejt shërimit. Pranimi i të kaluarës nuk nënkupton fajësim, por është mënyra për të çliruar veten nga një histori që nuk e ke zgjedhur.
Në raste të caktuara, një distancim emocional apo edhe fizik nga një prind narcisist mund të jetë i domosdoshëm për të mbrojtur mirëqenien mendore dhe emocionale.
Abuzuesit janë plotësisht përgjegjës për sjelljet e tyre. Nëse nuk e pranojnë problemin, nuk ka shpresë për ndryshim.
Mesazhi më i rëndësishëm? Nuk është faji yt mënyra si je rritur. Por është në dorën tënde të zgjedhësh si do ta vazhdosh jetën.
Të shërohesh, të ndërtosh kufij të shëndetshëm dhe të rivendosësh vlerën tënde personale është një rrugë që ia vlen të ndiqet.
