Legjenda e golfit, Tiger Woods, është përfshirë në një tjetër incident të rëndë, pasi u arrestua në Florida nën dyshimet për drejtim mjeti nën ndikimin e substancave, pas një aksidenti me përmbysje.
Sipas një deklarate zyrtare të një oficeri policie, të siguruar nga Daily Mail, golfisti 50-vjeçar kishte në xhep dy pilula të bardha të etiketuara “M367”, të identifikuara si hidrokodon, një qetësues i fortë opioid që përdoret për dhimbje të forta.
Woods u ka thënë autoriteteve se para aksidentit ishte i shpërqendruar duke kontrolluar telefonin dhe duke ndërruar stacionet e radios, teksa lëvizte në zonën e Jupiter Island, Florida, ku ai jeton prej vitesh.
Oficerët vunë re se ai shfaqte shenja të dukshme shqetësimi fizik: djersitje të tepërt, lëvizje të ngadalta, sy të skuqur dhe bebëza të zgjeruara.
Ai gjithashtu kishte vështirësi gjatë testeve në terren, duke u penguar dhe duke mos qenë në gjendje të drejtonte në mënyrë të sigurt.
Edhe pse testi i alkoolit rezultoi negativ, Woods refuzoi të jepte një mostër urine, gjë që çoi në arrestimin e tij. Autoritetet dyshojnë se ai mund të ketë qenë nën ndikimin e ilaçeve të forta kundër dhimbjes.
Aksidenti ndodhi pasi ai tentoi të parakalonte një kamion me rimorkio me shpejtësi të lartë në një rrugë banimi, duke përfunduar në përplasje dhe përmbysje të automjetit të tij.
Ky nuk është rasti i parë për Woods. Ai ka pasur probleme të mëparshme me përdorimin e qetësuesve dhe aksidente rrugore, përfshirë një incident serioz në vitin 2021 që i shkaktoi dëmtime të rënda fizike.
Megjithatë, burime pranë tij insistojnë se ai nuk përdor substanca të paligjshme, por ka qenë për vite me radhë nën trajtim me qetësues për shkak të dëmtimeve të shumta gjatë karrierës.
Ngjarja e fundit hedh sërish hije mbi jetën personale të një prej sportistëve më të mëdhenj në histori, duke ngritur pikëpyetje për gjendjen e tij shëndetësore dhe të ardhmen në sport.
