Presidenti i SHBA-së, Donald Trump, mbajti një fjalim të gjatë në Mëngjesin e Lutjeve në Uashington, duke prekur tema nga ushtria, sporti, feja dhe politika e tij e emigracionit.
Trump vlerësoi forcat e armatosura, duke thënë: “Kemi një ushtri ku të gjithë duken si Tom Cruise, por janë më të gjatë”. Ai gjithashtu përmendi sukseset sportive, duke u mburrur se ka ndihmuar për sjelljen e Lojërave Olimpike të vitit 2028 në Los Angeles dhe të Kupës së Botës këtë verë në SHBA, Kanada dhe Meksikë. Në fjalimin e tij nuk munguan komentet për “zgjedhjet e humbura” të vitit 2020.
Një tjetër pikë kryesore e fjalimit ishte feja. Trump u shpreh se ka bërë “më shumë për fenë sesa çdo president tjetër” dhe kritikoi ata që votojnë për Demokratët. Ai komentoi gjithashtu me humor për idenë e shkuarjes së tij në parajsë:
“Kur thashë se nuk do të shkoja kurrë në parajsë, po bëja shaka… Me të gjitha të mirat që bëj, ndoshta do t’ia dal.”
Presidenti Trump premtoi gjithashtu të “ripërkushtojë Amerikën si një Komb të Vetëm nën Zotin” dhe foli për politikën e tij të imigracionit, duke theksuar largimin e mijëra emigrantëve të paligjshëm. Ai iu përgjigj edhe kritikëve që e akuzojnë se është diktator, duke thënë se ata janë të padrejtë dhe se sulmet ndaj të krishterëve do të trajtohen me vendosmëri.
Fjalimi i tij përfshiu një përzierje mes seriozitetit, politikës dhe shakave, duke reflektuar stilin karakteristik të Presidentit Trump.
LEXO EDHE: Agjentët e kapën kur po shkonte në shkollë, 10-vjeçarja lirohet pas një muaji nga paraburgimi i ICE
