Në një konferencë për media në përfundim të mbledhjes së Këshillit të Sigurisë së Kosovës ku u diskutua situata në veri, pas sulmit të armatosur ndaj policisë, me një efektiv të vrarë e një të plagosur në Banjska të Zveçanit, kryeministri Albin Kurti tha se “sot është një ditë e rëndë për Kosovën”.
Vrasja e zyrtarit policor duhet të kthehet në angazhim edhe më të shtuar në luftimin e bandave, strukturave ilegale, krimit e terrorizmit, që e cënojnë sigurinë qytetarëve dhe rendin kushtetues.
Kurti konfirmoi se ende vazhdojnë sulmet në zonën ku u vra rreshteri Afrim Bunjaku.
Janë së paku 30 persona të armatosur rëndë, profesionistë, ushtarakë e policë, të cilët ndodhen nën rrethimin e forcave tona policore dhe të cilët i ftoj që të dorëzohen te organet tona të sigurisë.
Sipas shefit të qeverisë, “formacioni me këta persona profesionistë është dhe pranë Manastirit në Banjskë”. Ndërsa shfaqi disa foto në ekran, Kurti vuri në dukje se banorët lokalë serbë “nuk kanë automjete të tilla” e po kështu, “asnjë civil tjetër në Republikën e Kosovës”.
Organet tona të sigurisë dhe prokuroria, me siguri, do të zhvillojnë hetime për të kuptuar më shumë për këto uniforma. Unë u bëj thirrje të gjithë atyre, edhe si formacion, edhe si individë që t’iu dorëzohen organeve të sigurisë, të cilat e kanë vendosur perimetrin rreth tyre në Banjskë. Eshtë shumë e rëndësishme që kjo situatë të përmbyllet në mënyrë të qetë dhe më pas do të vendoset për më tutje.
Në konferencën për media në krah të kryeministrit Kurti, zv.drejtori i Policisë së Kosovës, Fehmi Hoti u pyet nëse ka mundësi që pjesëtarë të grupit mercenar rus Wagner të jenë infiltruar në veri? Hoti u shpreh se “asgjë nuk është e faktuar”.
Sa i përket grupit Wagner, kemi pasur informacione edhe më herët, kemi pasur informacione që individë të grupit Wagner po lëvizin ose mund të lëvizin ose mund të sulmojnë. Të gjitha janë trajtuar. Mirëpo deri më tani nuk kemi diçka të argumentuar, të faktuar. Ju e dini që gjykatat kërkojnë gjithçka të dokumentuar. Si informacione i kemi trajtuar dhe jemi duke i trajtuar.
Dioqeza e Rashkës-Prizrenit dënoi sulmin ndaj Policisë së Kosovës e theksoi se “kjo ngjarje mund të ketë pasoja të mëdha ndaj është e rëndësishme të ruhet paqja”. Dioqeza u shpreh e shqetësuar për shkak se “një grup personash të armatosur, të maskuar kanë hyrë në Manastirin Banjska me automjet të blinduar, duke thyer portën e mbyllur”.
Persona të armatosur, të maskuar, po lëvizin nëpër oborr dhe herë pas here dëgjohen të shtëna. Dioqeza dënon ashpër dhunën e hapur që ushtrohet në objektin fetar të Kishës Ortodokse Serbe, duke u bërë thirrje të gjitha palëve që sa më parë t’i japin fund konfliktit!
Në fillim të korrikut, deputetja britanike Alicia Kearns deklaroi se në veri të Kosovës “armët po kontrabandohen në autoambulanca dhe më pas po ruhen në objektet e kishave”. Misioni ushtarak i NATO-s në Kosovë, KFOR njoftoi se nuk gjeti asnjë provë për pretendimet e Kearns-it, ndërsa autoritetet e Kosovës nisën hetime.
