Disa vende po punojnë mbi një projektrezolutë për të shpallur 11 korrikun, Ditë Ndërkombëtare të Reflektimit dhe Kujtimit të Gjenocidit të vitit 1995 në Srebrenicë. Sipas një dokumenti që ka parë Zëri i Amerikës, Ruanda dhe Gjermania po udhëheqin këtë përpjekje, por sipas informacioneve që ka siguruar, pjesë e kësaj nisme janë edhe Shtetet e Bashkuara, Shqipëria, Bosnja, Kili, Finlanda, Zelanda e Re, Turqia dhe vende të tjera.
Pjesërisht, projektrezoluta bazohet në rezolutën e Asamblesë së Përgjithshme të OKB-së të vitit 2004, që shpalli 7 Prillin, Ditë Ndërkombëtare të Reflektimit për Gjenocidin e vitit 1994 ndaj grupit Tutsi në Ruandë.
Projektrezoluta do të paraqitet në një takim më të gjerë me dyer të mbyllura të vendeve të OKB-së më 17 prill. Në atë takim, hartuesit e dokumentit mund të marrin parasysh propozimet e vendeve të tjera anëtare e të shohin se çfarë mbështetje mund të presin për nismën e tyre në Asamblenë e Përgjithshme të OKB-së, e cila përbëhet nga 193 vende anëtare.
Në tekstin e projektrezolutës që ka parë Zëri i Amerikës, mes të tjerave dënohet çdo përpjekje për të mohuar gjenocidin në Srebrenicë e për të ngritur figurat e atyre që janë dënuar për krime lufte, krime kundër njerëzimit e gjenocid. Gjithashtu thekson rëndësinë e përfundimit të procesit të gjetjes dhe identifikimit të vikimave të mbetura të gjenocidit në Srebrenicë e vazhdimin e përpjekjeve për të nxjerrë para drejtësisë autorët e këtij krimi.
Projektrezoluta i drejtohet me një thirrje sekretarit të Përgjithshëm të OKB-së, Antonio Guterres që të krijojë një program të quajtur “Gjenocidi i Srebrenicës dhe OKB-ja” e që do të merrej me përgatitjet për organizimin e aktiviteteve për shënimin e 30 vjetorit të Masakrës së Srebrenicës në vitin 2025.
Sipas burimeve të Zërit të Amerikës, Serbia është duke lobuar fortë kundër projektrezolutës. Më 11 korrik të vitit 1995, më shumë se 8 mijë burra dhe djem myslimanë boshnjakë u ekzekutuan nga forcat e serbëve të Bosnjës në Srebrenicë.
Ish-udhëheqësi i serbëve të Bosnjës, Radovan Karaxhiç u dënua më burgim të përjetshëm në vitin 2019 për gjenocid, krime kundër njerëzimit dhe shkelje të ligjeve e zakoneve të luftës, lidhur me rolin e tij udhëheqës në fushatën e terrorit ndaj popullsisë civile, përfshirë masakrën e Srebrenicës, ndër mizoritë më të rënda në Europë që nga përfundimi i Luftës së Dytë Botërore.
