Së fundmi ka “lindur” një tension mes gjigantit ‘Amazon’ dhe ekipit të futbollit të Seria A, Lazio. Tensioni ka lindur nga një serial i dedikuar gjeniut të futbollit ndërkombëtar, Diego Armando Maradona. “Maradona: Blessed Dream” është prodhimi i fundit i prodhuar enkas për platformën Amazon dhe përmbledh jetën e argjentinasit, triumfet në fushën e blertë dhe dështimet si njeri.
Por është pikërisht skena e parë ajo që ka tërbuar drejtuesit e Lazios, ndër to edhe Igli Taren. Skena tregon një moment, me sa duket fiktiv, kur argjentinasi mbledh shokët në fushë duke i mbajtur një fjalim para ndeshjes. Fjalët e Maradonës në film janë pikërisht këto:
Sot këto fashistët duan të na poshtërojnë. Na duan në gjunjë, në shtëpinë tonë dhe ne nuk do ta lejojmë këtë.
Termi ‘fashist’ ishte natyrisht i drejtuar ndaj Lazios, ekip që shpeshherë, edhe ditët e fundit, është akuzuar për tifozerinë që përqafoi idetë e ekstremit të djathtë. Por drejtuesit e Lazios nuk kanë reaguar mirë ndaj kësaj pjese, që sipas tyre ofendon ekipin, pa arsye.
I kemi kërkuar Amazon të presë këtë skenë, që ofendon ekipin dhe tifozët tanë me anë të një fjalie qesharake. Maradona në shumë raste ka treguar se ka qenë mik i Lazios, ka qenë në qendrën tonë sportive, ka kënduar edhe himnin tonë.
Rikujtojmë, se pak kohë më parë e dashura e të ndjerit, legjendës së futbollit Diego Maradona-s, Mavys Alvarez, rrëfeu një histori të trishtë me super yllin e futbollit që kishte ndodhur kur ajo ishte vetëm 16-vjeçe. Mavys theu heshtjen dhe tregoi se si ishte marrëdhënia e saj me Diego-n në atë periudhë.
Ajo tregoi momentin kur ai i dha asaj kokainë e po ashtu edhe për vështirësitë për të dalë nga varësia që krijoi. Vetëm disa muaj pas vdekjes së Diego-s ka ende shumë mistere që mbeten të pazgjidhura. Lufta për trashëgiminë e tij mes ish-gruas Claudia Villafane, fëmijëve të tij dhe atyre që po luftojnë për t’u njohur si anëtarë të familjes është bërë skena më e nxehtë.
