Së fundmi, Elton John është detyruar të shtyjë turin në Europë. Legjenda e muzikës ka njoftuar në rrjetin e tij social Instagram se i ka shtyrë datat e koncerteve pasi duhet ti nënshtrohet një operacioni në ije. 74-vjeçari shpjegoi se një rrëzim gjatë verës i ka shkaktuar dhimbje të forta. Në këto kushte ai duhet të operohet për të shmangur komplikimet.
Me një trishtim të madh dhe një zemër të rënduar jam i detyruar të riplanifikoj datat e vitit 2021 të turneut tim në Evropë dhe MB në 2023. Në fund të pushimit tim veror, rashë në një sipërfaqe të fortë dhe kam qenë në dhimbje dhe shqetësime të konsiderueshme në ijet e mia që nga ajo kohë. Megjithë trajtimin intensiv, dhimbja ka vazhduar të përkeqësohet dhe po çon në rritjen e vështirësive në lëvizje. Unë jam këshilluar që të bëj një operacion sa më shpejt të jetë e mundur për t’u siguruar që nuk do të kem më komplikime afatgjata. Unë do të ndërmarrë një program fizioterapie intensive që do të sigurojë një shërim të plotë dhe një kthim në lëvizshmëri të plotë pa dhimbje.
Së fundmi, rikujtojmë se legjenda e muzikës zbuloi se së shpejti do të nxjerrë një album të ri i cili është regjistruar gjatë pandemisë. Albumi “The Lockdown Sessions” do të dalë më 22 tetor dhe përfshin bashkëpunime me artistët si Dua Lipa, Stevie Wonder, Lil Nas X, Stevie Nicks, Gorillaz, Eddie Vedder, reperi Young Thug dhe Nicki Minaj. Gjatë një interviste, këngëtari tregoi se regjistrimet janë kryer në internet, përmes aplikacionit “Zoom”.
Një nga këngët në album,”Cold Heart (PNAU Remix)” me Dua Lipa-n, ka bërë tashmë histori për John. Javën e kaluar, kënga debutoi në numrin 81 në “Billboard Hot 100”, duke shënuar hyrjen e 68-të të John në tabelë dhe hyrjen e tij të parë në mbi 21 vjet, pasi kënga e tij “Someday Out of the Blue” arriti në numrin 99 në tabelë me 29 korrik 2000.
