Legjenda e muzikës botërore Elton John është parë duke kaluar kontrollet e sigurisë në aeroportin e Palermos, pak orë pasi performoi në dasmën madhështore të Dua Lipa dhe Callum Turner në Siçili.
Artisti 79-vjeçar u fotografua teksa kalonte procedurat policore në aeroport, i veshur me një kostum sportiv blu me detaje të kuqe. Në krah të tij ishte bashkëshorti, David Furnish, me të cilin shihej duke ecur dorë për dore.
Pak më vonë, këngëtari u ndihmua të zbriste nga një minibus dhe hipi në një avion privat luksoz tip Bombardier Global 6000, me të cilin u nis nga Palermo rreth mesditës së së dielës.
Furnish, 63 vjeç, u pa gjithashtu duke fotografuar Elton John pranë avionit, ndërsa artisti pozonte me anëtarët e stafit të aeroportit para nisjes.
Elton John ishte një nga të ftuarit më të rëndësishëm të ceremonisë së zhvilluar në Villa Valguarnera, ku interpretoi hitin e tij të famshëm “Your Song” gjatë shkëmbimit të betimeve të çiftit.
Sipas raportimeve, ai dhe stilistja e njohur Donatella Versace u larguan menjëherë pas darkës ceremoniale, pa qëndruar për spektaklin e madh të fishekzjarreve që mbylli festën.
Avioni privat me të cilin udhëtoi artisti raportohet se ishte marrë me qira përmes një kompanie luksoze fluturimesh dhe kishte një kosto prej rreth 8 mijë paundësh në orë. Fluturimi drejt Farnborough në Angli zgjati afërsisht tre orë, ndërsa shpenzimet totale të udhëtimit thuhet se i janë afruar 50 mijë paundëve.
Ndërkohë, festa e Dua Lipës dhe Callum Turner vazhdoi deri në orën 06:00 të mëngjesit. Çifti organizoi një dasmë luksoze me vlerë rreth 1.5 milionë paund, ku morën pjesë rreth 200 të ftuar VIP.
Mbrëmja u karakterizua nga performanca muzikore, vallëzime, detaje romantike dhe një spektakël fishekzjarresh që ndriçoi qiellin e Siçilisë për më shumë se 10 minuta.
Dasma e çiftit po konsiderohet tashmë si një nga ngjarjet më luksoze dhe më të komentuara të showbiz-it ndërkombëtar këtë vit.
