Shtetet e Bashkuara të Amerikës vlerësojnë se “aktualisht, nuk ka kushte për mbajtjen e zgjedhjeve në veri të Kosovës më 18 dhjetor”. Ambasadori amerikan në Prishtinë, Jeffrey Hovenier, tha se siguria e të gjithë qytetarëve të Kosovës “duhet të jetë prioriteti më i lartë”.
Kthimi nga dhuna dhe frikësimi, përfshirë përdorimin e një mjeti shpërthyes, e rrezikimi i jetëve, kurrë nuk janë metodë e përshtatshme proteste, në asnjë rrethanë!
The United States condemns those who employed violence during yesterday’s incidents in northern Kosovo. Resorting to violence and intimidation, including use of an explosive device, and endangering lives is never an appropriate method of protest, under any circumstances. 1/2
— Ambassador Jeff Hovenier (@USAmbKosovo) December 7, 2022
Komentet vijnë një ditë pasi grupe qytetarësh serbë në veri penguan hapjen e zyrave të Komisionit Qendror të Zgjedhjeve, duke shkaktuar incidente me armë zjarri e granata.
SHBA-të i dënojnë këto akte dhe u bëjnë thirrje të gjithë të përfshirëve për përmbajtje!
Zgjedhjet në katër komuna me shumicë serbe: Mitrovicë e Veriut, Zubin Potok, Leposaviç e Zveçan, u shpallën pasi në fillim të nëntorit, kryetarët e tyre dhanë dorëheqje. Kjo në shenjë kundërshtimi ndaj planit të qeverisë së Kosovës, për t’i riregjistruar makinat me targa ilegale serbe në veri.
Lista Serbe, partia më e madhe e serbëve në Kosovë, e cila me mbështetjen e Beogradit zyrtar i drejtoi këto komuna, kundërshton zgjedhjet. Prishtina i dënoi incidentet e djeshme dhe kryeministri Albin Kurti paralajmëroi shtim të forcave në veri.
Zyrtarë të KQZ-së thanë se “në të tilla rrethana, nuk vazhdohet me planet e paracaktuara”. Kryetari Kreshnik Radoniqi:
E padrejtë të kërkohet nga zyrtarët tanë që të dërgohen në një vend ku ka pasiguri.
Nga Serbia thanë se “qëllimi i institucioneve të Kosovës është që t’i rrëmbejnë me dhunë katër komunat në veri”, ndonëse nuk sollën ndonjë provë për këto pretendime. Tensionet mes Kosovës e Serbisë nisën të rriten që në verë, kur qeveria Kurti njoftoi se në veri, nuk do të lejojë më makina me targa që i lëshon Serbia.
Duke kundërshtuar këtë plan që nisi të zbatohej më 1 nëntor, serbët e veriut dhanë dorëheqje nga institucionet e Kosovës, si në nivel lokal, ashtu edhe në atë qendror. Më pas, dy vendet arritën marrëveshje për çështjen e targave, në bazë të së cilës, Prishtina pezulloi planin për riregjistrimin e makinave. Beogradi u zotua se nuk do të lëshojë targa të reja për serbët në veri.
