Kimmy Nguyen, një fanse e zjarrtë e reperit portorikan Bad Bunny, ka mahnitur banorët e Bostonit me një dekor unik për Halloween, të cilin e ka quajtur “Bad Boney”.
Instalacioni kreativ përfshin skelete që rikrijojnë momentet më të paharrueshme të artistit gjatë vitit, si performanca në “Saturday Night Live”, videoklipi “Baile Inolvidable” dhe pjesëmarrja në filmin “Happy Gilmore 2”.
Nguyen, e cila drejton biznesin e dekorimeve “Weightless Innovations” dhe punon gjithashtu në një kompani korporative, ka filluar përgatitjet që në prill, pas suksesit që pati një vit më parë me dekorin e skeletit të Taylor Swift.
Për të nderuar kulturën portorikane dhe albumin më të ri të Bad Bunny, ajo ka përfshirë elemente simbolike si kunguj blu, plantane në duar dhe kapela tradicionale portorikane “pava”.
Dëshiroja të përfaqësoja Puerto Ricon dhe albumin e tij, pa vendosur thjesht një flamur portorikan
-u shpreh Nguyen.
Rreth 500 vizitorë pritet të ndalojnë këtë Halloween për të parë instalacionin “Bad Boney”, ku Nguyen do t’u shpërndajë çokollata dhe surpriza të frymëzuara nga artisti. Ndërkohë, një skelet që “këndon si Bad Bunny” i shton dekorit ndjesinë e një koncerti të vërtetë.
Përveç argëtimit, projekti ka edhe një qëllim humanitar: vizitorët mund të dhurojnë përmes një kodi QR në fondacionin “Skeletons for St. Jude”, që mbledh fonde për luftën kundër kancerit pediatrik.
Nguyen thotë se synon që “Bad Boney” të sjellë gëzim, kreativitet dhe solidaritet në komunitet, duke bashkuar artin, dashurinë për muzikën dhe mbështetjen për një kauzë të rëndësishme.
