DeepSeek është bërë një nga aplikacionet më të shkarkuara në mbarë botën, por disa qeveri kanë shqetësime sigurie. Start-upi kinez DeepSeek e ka emocionuar botën e inteligjencës artificiale, me qeveritë që tashmë kanë ndaluar modelin e saj të DeepSeek-R1 vetëm disa javë pas lançimit të tij. Studimet kanë treguar se ka shqetësime mbi sigurinë kibernetike, duke përfshirë ndjeshmërinë e DeepSeek-R1 për të gjeneruar përmbajtje të dëmshme dhe të njëanshme. Duke qenë se është një kompani kineze, ligji thotë se çdo e dhënë e ndarë në aplikacione celulare dhe në ueb mund të qaset nga agjencitë kineze të inteligjencës, gjë që po krijon gjithashtu frikë për sigurinë kombëtare.
Agjencia e spiunazhit të Koresë së Jugut ka akuzuar aplikacionin kinez të inteligjencës artificiale për mbledhjen e “tepërt” të të dhënave personale. Në këtë drejtim është akuzuar në përdorimin e të gjitha të dhënave hyrëse “për të trajnuar veten” dhe janë vënë në pikëpyetje përgjigjet e aplikacionit ndaj pyetjeve në lidhje me “çështjet e krenarisë kombëtare”. Shërbimi Kombëtar i Inteligjencës (NIS) tha se u dërgoi një njoftim zyrtar agjencive qeveritare javën e kaluar duke u kërkuar atyre që të merrnin masa paraprake sigurie mbi aplikacionin e inteligjencës artificiale. Disa ministri qeveritare në Korenë e Jugut kanë bllokuar aksesin në aplikacion, duke përmendur shqetësimet e sigurisë, duke iu bashkuar Australisë dhe Tajvanit në paralajmërimin ose vendosjen e kufizimeve për DeepSeek.
Pasi prezantimi i DeepSeek bëri bujë në të gjithë botën, Google i është kundërpërgjigjur. Gjiganti i Alphabet ka zgjeruar linjën e tij Gemini AI me modelin e përballueshëm “Gemini-Lite”, duke synuar të konkurrojë me rivalë me kosto të ulët si DeepSeek i Kinës. Siç raportohet, Google ka përmirësuar aplikacionin Gemini me modelin 2.0 Flash, që ofron përgjigje më të shpejta dhe gjenerim të përmirësuar të imazhit. Gemini 2.0 Flash, i lansuar fillimisht si një model eksperimental në dhjetor, tani është përgjithësisht i disponueshëm nëpërmjet Gemini API në Google AI Studio dhe Vertex AI.
Një ligj i propozuar së fundmi mund t’i bëjë njerëzit në SHBA të përballen me gjoba të konsiderueshme apo edhe me burg, për përdorimin e aplikacionit kinez të AI DeepSeek. Projektligji, i paraqitur nga senatori republikan Josh Hawley, synon të ndalojë personat e Shteteve të Bashkuara të avancojnë aftësitë e inteligjencës artificiale brenda Republikës Popullore të Kinës dhe për persona të tjerë. Ligji i propozuar do të parandalonte importimin e teknologjisë ose pronës intelektuale të zhvilluar në Kinë, ku kushdo që shkel kufizimet do të përballet me 20 vjet burg.
