Krimet ekonomike të Policisë së Kosovës, të udhëhequr nga Prokuroria Themelore në Prizren kanë ndërmarrë një aksion në disa rajone të vendit.
Kryeprokurori i Prokurorisë Themelore në Prizren, Petrit Kryeziu, tha shkurtimisht për Radion Evropa e Lirë se shënjestra të këtij aksioni janë “mbi 40 të dyshuar, në pothuajse të gjitha rajonet e Kosovës”.
Betimi për Drejtësi, web-faqe e specializuar për fushën e sundimit të ligjit raportoi se gjatë aksionit janë arrestuar disa persona në rajonet e Prizrenit, Prishtinës, Pejës, Gjilanit, Ferizajt, Mitrovicës dhe Gjakovës.
Në mesin e të arrestuarve, sipas Betimit për Drejtësi, janë Sami Mazreku, ish-drejtor i Byrosë Kosovare të Sigurimeve dhe ish-drejtori i Financave i kësaj byroje, Valon Berisha.
Dyshohen se kanë paguar qytetarë të ndryshëm në emër të sigurimeve, në vlerë mijëra euro. Betimi për Drejtësi mëson se një pjesë e shumave ndahej me ta.
Raportohet se aksioni po zhvillohet lidhur me dyshimet për kryerjen e veprave penale: “Keqpërdorim i besimit”, “Keqpërdorim i autorizimeve në ekonomike”, “Ndihmë në keqpërdorim të besimit” dhe “Falsifikim të dokumentit”.
Në këtë aksion thuhet se janë përfshirë një numër i madh i prokurorëve dhe policëve.
