Një nga personazhet më të paharrueshme të filmave të Harry Potter, fantazma Moaning Myrtle, është rikthyer në vëmendje pas një zbulimi surprizë nga aktorja që e portretizoi atë.
Shirley Henderson, sot 60 vjeçe, ka treguar se ishte plot 37 vjeçe kur luajti rolin e nxënëses 14-vjeçare në filmat “Harry Potter and the Chamber of Secrets” (2002) dhe “Goblet of Fire” (2005).
Moaning Myrtle, e cila kishte ndërruar jetë si adoleshente në shkollën Hogwarts dhe që prej atëherë shfaqej si fantazmë në banjën e vajzave, ishte një nga figurat më të dashura dhe komike të serisë.
Personazhi u fiksua pas Harry Potter-it, pasi ai ishte një nga të paktët që i tregoi mirësjellje.
Në një intervistë për The Independent, Henderson zbuloi se drejtuesit e kastit e kishin këshilluar të mos tregonte moshën e saj të vërtetë gjatë audicionit.
Drejtori i kastit më tha: ‘Provoje dhe mos e përmend moshën tënde’
-rrëfeu ajo.
Aktorja pranoi se fillimisht ishte e pasigurt nëse mund të interpretonte një vajzë 14-vjeçare, pasi ndodhej në të tridhjetat. Madje, në atë kohë nuk ishte as e familjarizuar me serinë.
Kur më kërkuan të bëja audicionin, nuk e dija as kush ishte Harry Potter. Motra ime, që po qëndronte me mua, i kishte lexuar librat
-tregoi ajo.
Megjithatë, Henderson përgatiti pamjen e duhur për takimin me producentët dhe arriti të bindte ekipin se ishte zgjedhja ideale për rolin, një vendim që më vonë u kthye në një nga interpretimet më ikonike të serisë.
