Në mbledhjen e kësaj të hëne të Grupit Parlamentar të PS-së është vendosur ngritja e dy Komisioneve të Posaçme, për Reformën Zgjedhore dhe për Reformën Administrative Territoriale. Kreu i Grupit, Taulant Balla, në një prononcim për gazetarët, bëri me dije se për të drejtuar Komisionin për Territorialen kanë propozuar Arbjan Maznikun, ndërsa për Reformën Zgjedhore Damian Gjiknurin.
Ai tha se shpreson që Komisionet të udhëhiqen nga interesi i përbashkët i të gjithë aktorëve politikë në Kuvend. Duke u ndalur te Zgjedhorja, Balla tha se duhet të adresohen rekomandimet e OSBE/ODIHR, dhe me urgjencë çështjet e “nxehta” si depolitizimi i Komisioneve Zgjedhore dhe ligji për financimin e partive. Një thirrje pati për opozitarët, teksa tha se të ulen sa më shpejt në tryezë për ngritjen e Komisioneve.
“Në përmbyllje të mbledhjes, dua të informoj se grupi i PS do të institucionalizojë në orën 01:00 dy nisma që kanë të bëjnë me ngritjen e dy Komisioneve të Posaçme në Kuvend, i pari Komisioni i Posaçëm për Reformën zgjedhore, traditë prej shumë vitesh që në fillim të çdo legjislature grupi i PS ka qenë nismëtari i ngritjes së këtyre komisioneve të Posaçme për Reformën Zgjedhore. Uroj shumë që komisioni të udhëhiqet nga interesi i përbashkët i të gjithë aktorëve politikë në Kuvend për të përmbyllur rekomandimet e OSBE-ODIHR ndër vite, ku do të theksoja mbetet çështja e depolizitimit të Komisioneve Zgjedhore, duke risjellë në vëmendje edhe zgjedhjet e fundit ku formacione të caktuara politike kontestuan punën e komisionerëve apo numëruesve të tyre vunë në dyshim cilësinë e punës së tyre. PS mbetet partia që ndër vite e ka mbështetur çështjen e depolitizimit. Kam theksuar se ndër çështjet që duhet të adresojë Komisioni i Posaçëm i Reformës Zgjedhore me urgjencë mbetet rritja e transparencës së fushatave zgjedhore dhe të partive politike. Mund t’iu them se është bërë punë e mirë me shumë ekspertë të atashuar ndër vite. Ligji për financimin e partive politike bën pjesë në detyrat e shtëpisë dhe duhet realizuar brenda këtij sesioni. Çështja e dytë, ndoshta për disa duket si futuriste, por duhet adresuar në këto ndërhyrje të radhës që do të bëhen në Kodin Zgjedhor. Duhet të kemi nenet përkatëse ose draftin gati të republikës së Shqipërisë sa i përket mbajtjes së zgjedhjeve për PE, sepse në pritshmëritë tona po afrohet momenti ku duhet të ketë edhe anëtarët e vet në PE. Nisma tjetër ka të bëjë me Komisionin e Posaçëm te Reformës Administrative Territoriale. Projektvendimi i Kuvendit duhet të ketë paritetin e përfaqësimit mes maxhorancës dhe opozitës. Të gjitha rekomandimet duhen parë në një kontekst më shumë se 10-vjeçar për t’i hapur rrugë reformave të reja sa i përket rolit dhe ndarjes administrative territorial. Uroj dhe shpresoj që edhe grupi parlamentar i PD, i Aleancës për ndryshim dhe PL, dhe deputetët e tjerë sipas projektvendimit që do miratohet të plotësojnë vakancat.”, u shpreh Balla.
