Në botën gjithnjë e më të ndërlidhur me internetin, rreziqet e mashtrimeve online po shtohen çdo ditë. Ekspertët e sigurisë kibernetike nga kompania CyberX paralajmërojnë se sot më shumë se kurrë, qytetarët janë të ekspozuar ndaj skemave të sofistikuara të shfrytëzimit, ku autorët përdorin identitete të rreme për të fituar besimin e viktimave.
Një rast i fundit ka tronditur opinionin publik: një grua 65-vjeçare, e cila dëshiron të mbetet anonime, ra pre e një mashtrimi romantik që zgjati mbi dy vite.
Historia nisi në Instagram, ku një person u prezantua si aktori i famshëm Liam Neeson. Komunikimi u zhvillua më pas në email dhe Telegram, duke përfshirë mesazhe audio, foto dhe madje edhe video-thirrje me cilësi të dobët.
Duke shfrytëzuar emocionet dhe besimin e viktimës, mashtruesi arriti ta bindte atë të kryente pagesa të njëpasnjëshme për shpenzime të ndryshme. Në total, gruaja humbi rreth 20 mijë euro, të transferuara përmes bankës dhe kartave të parapaguara.
Mashtrimi arriti kulmin kur autori kërkoi para për të blerë një shtëpi në Greqi dhe një makinë luksoze, duke premtuar një jetë të përbashkët.
Vetëm pas ndërhyrjes së dy fëmijëve të saj, viktima kuptoi mashtrimin dhe kërkoi ndihmë nga ekspertët. Hetimet treguan se profili i “Liam Neeson” ishte i rremë, ndërsa paratë përfundonin në llogari të huaja dhe më pas shndërroheshin në kriptomonedha, duke e bërë gjurmimin pothuajse të pamundur.
CyberX thekson se ky është një shembull tipik i “mashtrimit romantik online”, një skemë që po përhapet me shpejtësi në gjithë botën.
Ekspertët paralajmërojnë qytetarët të jenë të kujdesshëm me njohjet virtuale, veçanërisht kur ato shoqërohen me kërkesa financiare.
Mos dërgoni para apo të dhëna personale personave që nuk i njihni realisht. Verifikoni gjithmonë identitetin dhe kërkoni këshillë nga autoritetet në rast dyshimi
-apelon kompania e sigurisë kibernetike.
Ky rast tregon qartë se përveç humbjes financiare, viktimat e mashtrimeve romantike përjetojnë edhe pasoja të rënda psikologjike, duke humbur besimin te njerëzit dhe ndjenjën e sigurisë brenda shtëpisë së tyre.
