Rei Manaj nuk e mbylli aspak mirë sezonin me Sivaspor. Dhe pse ka qenë lojtar në kyç në dy sezonet e fundit, sulmuesi i Kombëtares pati krisje me klubin turk.
Për këtë e ardhmja është vendosur në dyshim, teksa Sivaspor do të luajë në Ligën e Parë përgjatë edicionit të ardhshëm. Së fundmi u pyet për Manajn vetë drejtori teknik i Sivaspor, Osman Zeki Korkmaz.
“Mendoj se lojtari më i mirë është ai që ndodhet në fushë. Çdo lojtar që futet në fushë, stërvitet dhe respekton traditat, historinë e qytetit dhe të klubit është i barabartë.
Janë 22 lojtarë dhe 4 portierë që kanë filluar të punojnë individualisht. Mos harroni se Robertos Karlos dhe Sisinjo erdhën në këtë qytet. Shpresojmë t’i lëmë ditët e këqija pas. Të rëndësishëm nuk janë individët, por Sivaspori”, u shpreh drejtori teknik.
Sipas mediave lokale turke, destinacioni i radhës për Manajn mund të jetë Samsunspori, që po kërkon përforcime në repartin sulmues për sezonin e ri. Bardhekuqtë e mbyllën sezonin në vendin e tretë dhe do të përfaqësojnë futbollin turk në arenën ndërkombëtare, ndaj kërkojnë të rrisin cilësinë e skuadrës në këtë merkato vere.
Rey Manaj shihet si një profil ideal për të rritur efikasitetin ofensiv të Samsunsporit, ndërsa në këtë klub është aktiv edhe një tjetër përfaqësues i Shqipërisë, Arbnor Muja.
Me marrëdhëniet e prishura në Sivasspor dhe interesimin konkret të Samsunsporit, lëvizja e Manajt duket gjithnjë e më afër, ndërsa merkatoja pritet të sjellë zhvillime të rëndësishme për të ardhmen e tij në javët në vijim.
