Modelja, DJ-ja dhe artistja kreative nga Londra, Kim Turnbull, do të jetë një nga emrat që do të ngjitet në skenën e Sunny Hill Festival 2026, ku do të performojë me setet e saj si DJ.
Turnbull është një emër gjithnjë e më i njohur në industrinë e modës dhe muzikës, por vitet e fundit ka tërhequr vëmendje edhe për lidhjen e saj me Romeo Beckham, djalin e legjendës së futbollit David Beckham dhe stilistes Victoria Beckham.
E lindur në një familje artistësh, Kim është rritur mes artit, muzikës dhe kreativitetit. Ajo e nisi karrierën në modeling në vitin 2017, duke bashkëpunuar me disa prej markave më prestigjioze në botë, si Tommy Hilfiger, Marc Jacobs, Rimmel London dhe Fendi.
Gjatë pandemisë COVID-19, ajo vendosi t’i përkushtohej një tjetër pasioni të saj, muzikës. Brenda pak vitesh, Kim u shndërrua në një DJ profesioniste, duke performuar në klube dhe festivale ndërkombëtare me sete të fokusuara kryesisht në hip-hop dhe muzikë elektronike.
Arti është pjesë e trashëgimisë së saj familjare. Babai i Kim, Alex Turnbull, është një DJ i njohur britanik, ndërsa gjyshi i saj, William Turnbull, ishte një prej skulptorëve më të vlerësuar në Britaninë e Madhe.
Përveç karrierës, jeta e saj private ka qenë shpesh në qendër të mediave. Në fund të vitit 2024 ajo nisi lidhjen me Romeo Beckham, me të cilin është fotografuar në disa evente publike, duke u kthyer në një nga çiftet më të komentuar të showbiz-it britanik.
Tashmë Kim Turnbull pritet të sjellë energjinë e saj në Sunny Hill Festival 2026, ku publiku do ta shohë në rolin që e ka bërë të njohur vitet e fundit: atë të DJ-së, me performanca që kanë fituar popullaritet në skenën ndërkombëtare.
