Elon Musk ka reaguar publikisht ndaj raportimeve që lidhen me komunikimin e tij me Jeffrey Epstein, duke pranuar se ishte i vetëdijshëm që disa email-e mes tyre mund të keqinterpretoheshin dhe të përdoreshin për të dëmtuar reputacionin e tij.
Në një përgjigje ndaj një përdoruesi në platformën X, miliarderi theksoi se askush nuk ka bërë më shumë presion se ai për publikimin e dosjeve të Epstein.
Jam i lumtur që më në fund ndodhi
-shkroi Musk, duke shtuar se ajo që e intereson realisht është ndjekja penale e “atyre që kryen krime të rënda me Epstein”.
Sipas Musk, kontakti i tij me financierin e ndjerë ka qenë minimal dhe ai ka refuzuar vazhdimisht ftesat për të vizituar ishujt privatë të Epstein apo për të udhëtuar me avionin famëkeq “Lolita Express”.
Ai ka deklaruar më herët se ka thënë “jo” ftesave për të vizituar ishujt Great St. James dhe Little St. James në Ishujt Virgjër të SHBA-së, të lidhur me akuza të rënda për abuzime seksuale ndaj vajzave të mitura dhe grave të reja.
Megjithatë, dokumente të publikuara së fundmi hedhin dritë mbi një korrespondencë të vitit 2013.
Më 13 dhjetor të atij viti, Musk i kishte dërguar një email Epsteinit, duke i shkruar se do të ndodhej në Ishujt Virgjër Britanikë dhe në Shën Barthélemy gjatë festave dhe duke e pyetur nëse kishte një “kohë të mirë për ta vizituar”.
Epstein iu përgjigj dy ditë më vonë, duke sugjeruar fillimin e vitit të ri dhe duke shtuar se “gjithmonë ka vend për ty”.
Në një email tjetër, dërguar ditën e Krishtlindjeve, Epstein shkruante se “data e dytë ose e tretë do të ishte perfekte” dhe se do ta merrte vetë.
Në këtë korrespondencë, Musk fillimisht shprehej se duhej të kthehej në Los Angeles mbrëmjen e 2 janarit, por më pas sugjeronte se mund ta shtynte largimin me një ditë, duke pyetur drejtpërdrejt:
Kur duhet të shkojmë në ishullin tuaj në orën 2?
Dokumentet nuk konfirmojnë nëse Musk e ka realizuar ndonjëherë këtë vizitë. Megjithatë, emailet tregojnë një nivel komunikimi mes dy burrave që nuk ishte bërë publik më parë, veçanërisht duke pasur parasysh përpjekjet e mëvonshme të Musk për t’u distancuar nga Epstein dhe për të lidhur publikisht politikanë apo kundërshtarë të tij me këtë çështje.
Kujtohet se gjatë përplasjes së ashpër me Donald Trump vitin e kaluar, Musk kishte sugjeruar se ish-presidenti po vononte publikimin e dosjeve të Epstein sepse emri i tij mund të ishte përfshirë në to.
Në shtator, pasi emri i tij u shfaq në një tjetër grup dokumentesh, Musk reagoi sërish duke theksuar se Epstein ishte përpjekur ta bindte të vizitonte ishullin e tij, por se ai e kishte refuzuar kategorikisht.
