Këngët në gjuhën angleze po humbasin gradualisht dominimin e tyre në klasifikimet muzikore globale, sipas të dhënave të reja të publikuara nga gjigandi i transmetimit muzikor Spotify.
Sipas kompanisë, gjatë vitit të kaluar këngë në 16 gjuhë të ndryshme u përfshinë në listën Global Top 50. Mes tyre ishin spanjishtja, koreanishja, portugalishtja, turqishtja, indonezishtja dhe arabishtja. Kjo shifër është më shumë se dyfishi i asaj që u regjistrua në vitin 2020.
Artist i vitit rezultoi reperi porto-rikan Bad Bunny, i cili këndon ekskluzivisht në spanjisht. Ndërkohë, fituesja e Brit Awards, Rosalía, ka përdorur plot 14 dialekte në albumin e saj më të fundit “Lux”.
Sipas Spotify, zhanri që ka shënuar rritjen më të shpejtë në botë është “Brazilian Funk”, me një rritje të audiencës prej 36 për qind. Ndërkohë K-pop është rritur me 31 për qind dhe Trap Latino me 29 për qind.
Këto zhanre kanë gjeneruar secili më shumë se 100 milionë dollarë të ardhura nga platforma gjatë vitit të kaluar.
Megjithatë, anglishtja vazhdon të mbetet gjuha dominuese në industrinë muzikore. Sipas International Federation of the Phonographic Industry, 14 nga 20 albumet më të shitura të vitit të kaluar janë kënduar ekskluzivisht në anglisht.
Në listë u përfshinë gjithashtu disa grupe të njohura nga Koreja e Jugut si Stray Kids, Enhypen dhe Seventeen, si dhe grupi japonez rock Mrs. Green Apple. Kjo tregon se fansat po eksplorojnë gjithnjë e më shumë muzikë përtej zhanreve tradicionale si rock dhe pop.
Javën e kaluar, lista e këngëve më të dëgjuara në Spotify përfshinte artistë nga shumë vende të botës, si Bad Bunny dhe Rauw Alejandro nga Porto Riko, Nadhif Basalamah nga Indonezia, Tyla nga Afrika e Jugut, Tems nga Nigeria dhe Ryan Castro nga Kolumbia.
Nga Meksika u përfshinë gjithashtu El Bogueto, Peso Pluma, Neton Vega dhe Fuerza Regida, ndërsa nga Koreja e Jugut lista përfshiu edhe Blackpink, Jung Kook dhe Jin.
Vlen të theksohet se disa këngë si “APT.” dhe “Golden” janë kryesisht në anglisht, por përmbajnë edhe fraza në gjuhën koreane.
Ndërkohë, Spotify bëri të ditur se gjatë vitit të kaluar ka paguar rreth 11 miliardë dollarë për industrinë muzikore, krahasuar me 10 miliardë dollarë në vitin 2024, duke e bërë atë shpërndarësin që paguan më shumë në botë.
Kompania theksoi gjithashtu se përfitimet nuk shkojnë vetëm tek artistët më të mëdhenj, pasi rreth gjysma e honorareve janë gjeneruar nga artistë dhe kompani të pavarura. Sipas të dhënave, më shumë se 13,800 artistë fituan mbi 100 mijë dollarë nga platforma gjatë vitit të kaluar.
