Violinisti Brian King Joseph ka ndezur debat në rrjetet sociale dhe në media, pasi disa ditë pas Krishtlindjeve ngriti padi ndaj aktorit të famshëm Will Smith, duke e akuzuar për ngacmim seksual dhe pushim të padrejtë nga puna. Smith i ka mohuar kategorikisht të gjitha pretendimet.
Joseph, 32 vjeç, i njohur për pjesëmarrjen e tij si finalist në “America’s Got Talent” në vitin 2018, publikoi më 25 dhjetor një video në Instagram, ku la të kuptohej se do të ndërmerrte veprime ligjore.
Në video, ai shprehej se po fliste hapur për shkak të padrejtësive që kishte përjetuar dhe për të inkurajuar edhe të tjerët që kanë frikë të tregojnë historitë e tyre.
Sipas padisë, gjatë një ndalese të turneut në Las Vegas në muajin mars, Joseph pretendon se gjeti derën e dhomës së tij të hotelit të hapur dhe brenda një shënim me përmbajtje joshëse, të lënë nga një person i panjohur.
Ai thotë se e raportoi menjëherë incidentin te ekipi i Will Smith, por në vend që të merreshin masa, ai u turpërua, u pushua nga puna dhe u zëvendësua.
Në dokumentet gjyqësore pretendohet gjithashtu se Smith e kishte nxitur dhe përgatitur për shfrytëzim seksual, akuza që kanë shkaktuar reagime të forta në publik, shkruan DailyMail.
Nga ana tjetër, avokati i Will Smith, Allen B. Grodsky, i ka quajtur akuzat “të rreme, të pabaza dhe të pamatura”, duke theksuar se ekipi ligjor i aktorit do t’i kundërshtojë ato me çdo mjet të mundshëm ligjor.
Videoja e Joseph-it në Krishtlindje u shoqërua me mbishkrimin:
Qëndroni të sigurt dhe mbrojini bindjet tuaja, pavarësisht gjithçkaje
-një mesazh që u interpretua si paralajmërim për zhvillimet që do të pasonin.
Padia u dorëzua zyrtarisht një ditë para Natës së Vitit të Ri, ndërsa dokumentet tregojnë se Joseph ishte ftuar edhe në shtëpinë e Will Smith në nëntor të vitit 2024 për të performuar, një detaj që shton më tej kompleksitetin e çështjes.
