Shkëndija ka konfirmuar zyrtarisht ndarjen me trajnerin Jeton Beqiri, pas përfundimit të kontratës në fund të sezonit 2025/2026.
Beqiri largohet nga pankina kuqezi pas një periudhe të suksesshme, ku arriti të shkruajë historinë me klubin tetovar.
Nën drejtimin e tij, Shkëndija fitoi titullin kampion në sezonin 2024/2025 dhe realizoi ecurinë më të mirë në arenën europiane, duke siguruar për herë të parë pjesëmarrjen në fazën e ligës së UEFA Conference League dhe duke avancuar deri në fazën play-off.
Pas mbylljes së marrëveshjes, palët vendosën të mos vazhdojnë bashkëpunimin edhe për sezonin e ardhshëm.
Beqiri është një emër i njohur edhe në futbollin shqiptar. Ai më herët drejtoi Bylisin, me të cilin arriti të shpallej kampion në Kategoria e Parë. Gjithashtu, te Shkëndija kishte punuar edhe si ndihmës i trajnerit Shpëtim Duro.
LEXO EDHE: Jose Mourinho te Reali i Madridit? Zgjedhjet te Los Blancos bllokojnë kthimin e portugezit në Spanjë
Trofeu i vetëm i Beqirit si trajner kryesor mbetet titulli kampion me Shkëndijën, ndërsa në sezonin e fundit skuadra nuk arriti të triumfojë përballë FK Vardar.
Në reagimin zyrtar, klubi falënderoi trajnerin për kontributin e dhënë dhe i uroi suksese në vijim të karrierës së tij profesionale.
