Astronautët e misionit Artemis II të NASA-s kanë ndarë fjalët e tyre të fundit përpara se të niseshin në udhëtimin historik drejt Hënës. “Jam Victor. Po e bëjmë për familjet tona”, dëgjohet të thotë Victor Gloover. “Jam Christina. Po e bëjmë për shokët tanë”, vazhdon Christina Koch. “Jeremy këtu. Po e bëjmë për të gjithë njerëzimin”, deklaroi Jeremy Hansen.
Ky mision shënon udhëtimin e parë me ekuipazh drejt sipërfaqes hënore në më shumë se gjysmë shekulli, duke përfaqësuar një moment të rëndësishëm në eksplorimin e hapësirës. Ekuipazhi i Artemis II, i përgatitur për këtë moment, shprehu mendimet e tyre duke reflektuar pritjen dhe seriozitetin e fluturimit të tyre të ardhshëm. Misioni i tyre shënon një epokë të re për programin hënor të NASA-s, duke u bazuar në sukseset e mëparshme dhe duke hapur rrugën për përpjekjet e ardhshme.
Artemis II është pjesë e një programi që tashmë ka arritur në dhjetëra miliarda dollarë. Kostot mbulohen kryesisht nga taksapaguesit amerikanë dhe plotësohen nga partnerë ndërkombëtarë dhe të sektorit privat. Vetë misioni nuk ka një çmim të veçantë të publikuar publikisht, por një audit i vitit 2021 nga Zyra e Inspektorit të Përgjithshëm të NASA-s, vlerësoi koston e operimit të raketës së Sistemit të Lançimit Hapësinor dhe anijes kozmike Orion në 4.1 miliardë dollarë për lëshim.
I njëjti audit parashikoi se e gjithë përpjekja e Artemis do t’i kushtonte NASA-s, 93 miliardë dollarë deri në vitin fiskal 2025. Në total, zhvillimi i raketës i kushtoi NASA-s gati 24 miliardë dollarë që nga fillimi i saj deri në fluturimin provë pa pilot të Artemis I në vitin 2022. Ndërkohë, anija kozmike Orion i kushtoi agjencisë më shumë se 20 miliardë dollarë që nga koha kur u zhvillua për herë të parë në vitin 2006 deri në vitin 2022, sipas Shoqërisë Planetare.
