Kur flet për Predrag Mijatoviç, është si të flasësh për golashënuesin e njërit prej golave më të rëndësishëm në historinë e Realit të Madridit. Sulmuesi malazez shënoi golin që i dha Realit të Madridit kupën e shtatë europiane më 20 maj 1998, në finalen në Amsterdam kundër Juventusit. Reali i Madridit dhe “La Vecchia Signora” (“Zonja e Vjetër”) po e riluajnë një ndeshje klasike të futbollit evropian në raundin e 1/8-ave të finaleve të Kupës së Botës për Klube. FIFA intervistoi Mijatoviçin për të diskutuar të kaluarën, të tashmen dhe të ardhmen e të dyja klubeve dhe, sigurisht, finalen në Amsterdam.
FINALJA E VITIT 1998 – “Ata ishin pak a shumë ajo që ka qenë Madridi këto dhjetë vitet e fundit. Ishte finalja e tyre e tretë radhazi dhe vetëm një ekip i shkëlqyer mund ta arrijë këtë. Ne (Reali) vinim pas një thatësire 32-vjeçare, kështu që imagjinoni sa shumë donim të bënim një paraqitje të mirë, por gjithashtu kishim shumë frikë se mos dështonim, gjë që ishte pak a shumë një gjë logjike për të luajtur kundër Juventusit. Ishim nën një presion të jashtëzakonshëm”, tha ish-lojtari për mediat zyrtare të FIFA-s. “Ne donim të bënim gjithçka që ishte e mundur për të bërë historinë e Realit, por imagjinoni nëse Juventusi do të shënonte katër gola kundër nesh. Kishte shumë presion. Para ndeshjes, të gjitha parashikimet ishin në favor të Juventusit. Pastaj del në fushë dhe gjithçka gjithmonë zhduket”, shtoi ai.
GOLI – “Ishte goli më i rëndësishëm që kam shënuar si profesionist dhe ishte gjithashtu i rëndësishëm në historinë e klubit. E mbaj mend me shumë dashuri dhe duhet të them se e kam parë pak a shumë një milion herë (qesh). Duhet të them se, përveçse ishte një gol i rëndësishëm, nuk ishte e lehtë të shënoja, sepse nuk kisha shumë kohë ose hapësirë. Për fat të mirë, dija si të reagoja mirë”, thotë Mijatoviç, pa përmendur pozicionin e mundshëm jashtë loje. “Ajo ditë shënoi një pikë kthese për klubin. Pas së shtatës, u fituan edhe tetë kupa të tjera europiane. Ishte si të shkëputeshe nga fati i keq në atë garë. Që nga ajo kohë, i teti, i nënti…” – pohoi ish-sulmuesi.
KUPA E BOTËS PËR KLUBE – “Madridi është në procesin e ndërtimit të një skuadre të re, me një trajner të ri dhe është forcuar shumë. Juve gjithashtu ka humbur një pjesë të dominimit që kishte në futbollin italian, kështu që të dyja ekipet kanë pak a shumë të njëjtën dinamikë. Madridi duhet të fitojë përsëri, Juventusi duhet të dominojë përsëri futbollin europian. Është një ndeshje shumë interesante”.
KSABI ALONSO – “Pas Ançelotit, puna me ekipin nuk është e lehtë, por mendoj se Ksabi është shumë i qartë. Ekipi filloi paksa ngurrues, por ata po përmirësohen me çdo ndeshje dhe kjo më jep shumë shpresë se Madridi do të jetë në formë të shkëlqyer për të garuar në të gjitha garat. Pastaj, në futboll, padyshim që duhet të jesh me fat”, përfundoi Mijatoviç.
