Mbrojtja Civile në Rripin e Gazës njoftoi sot se të paktën 16 persona, përfshirë 9 fëmijë, u vranë në një sulm izraelit në një klinikë në kampin e refugjatëve në Jabalia, në pjesën veriore të enklavës palestineze.
“Të paktën 16 viktima, përfshirë 9 fëmijë, u dërguan (në spitale) së bashku me dhjetëra të plagosur” nga sulmi që “shënjestroi një ndërtesë të ( agjencisë së OKB-së për refugjatët palestinezë ) UNRWA që strehonte një klinikë” në këtë kamp, tha Mahmoud Bassal, një zëdhënës i Mbrojtjes Civile Palestineze.
Nga ana tjetër, ushtria izraelite deklaroi se goditi objektivat e Hamasit në Jabalia. Në mesazhin përkatës në Telegram , ai pohoi se
“Terroristët fshiheshin brenda një qendre komandimi dhe kontrolli që përdorej për të koordinuar aktivitetin terrorist dhe shërbente si pikë qendrore takimi e organizatës terroriste. Përveç kësaj, kompleksi u përdor nga Batalioni Jabalia i Hamasit për të planifikuar sulme terroriste kundër civilëve izraelitë dhe trupave të IDF”, thuhet në deklaratën e IDF-së.
Ushtria izraelite zgjeroi ofensivën e saj tokësore në Rripin jugor të Gazës, duke përparuar në lagjen al-Jneina të Rafah, si pjesë e përpjekjeve për të zgjeruar një zonë tampon përgjatë kufijve të enklavës. Gjatë operacionit, ushtria raportoi se trupat shkatërruan infrastrukturën e Hamasit në zonë.
Më vete, dhjetëra sulme ajrore u kryen gjatë fundjavës, duke synuar atë që ushtria thotë se janë Hamasi dhe infrastruktura e Xhihadit Islamik Palestinez. Objektivat përfshinin depo armësh, raketahedhës dhe ndërtesa të përdorura nga grupet terroriste. Sulmet, shtoi ushtria izraelite, vranë gjithashtu disa operativë terroristë, përfshirë ata që ishin përgjegjës për sulmet me mortaja ndaj Izraelit.
