Një zhvillim i ri ka ndezur edhe një herë interesin për betejën e bujshme ligjore mes Blake Lively dhe Justin Baldoni. Gjyqi, i cili ishte planifikuar të niste më 9 mars 2026, është shtyrë për datën 18 maj. Vendimi u bë publik nga gjyqtari Lewis J. Lyman gjatë një seance dëgjimore të martën, më 9 dhjetor.
Sipas gjyqtarit, dy çështje penale të tjera kërkojnë ndërhyrje të menjëhershme dhe “pavarësisht rëndësisë së këtij procesi”, ato duhet të trajtohen të parat.
Ai u ka kërkuar gjithashtu palëve të marrin në konsideratë mundësinë e arritjes së një marrëveshjeje jashtë gjyqit, përpara se të përfundojnë në sallën e gjykatës.
Përplasja mes dy aktorëve shpërtheu në dhjetor 2024, kur Blake Lively paditi kolegun e saj të filmit “It Ends With Us” duke e akuzuar për ngacmim seksual, sjellje hakmarrëse dhe shkaktim të shqetësimit emocional.
Lively pretendon se Baldoni ka bërë komente të papërshtatshme dhe ka tentuar të dëmtojë reputacionin e saj. Aktori i ka mohuar të gjitha akuzat.
Ndërkohë, Baldoni u kundërpërgjigj fillimisht me padi ndaj New York Times, dhe më pas ndaj Lively dhe bashkëshortit të saj, Ryan Reynolds, ku kërkonte miliona dollarë dëmshpërblim.
Megjithatë, këto padi u rrëzuan në qershor, dhe një vendim i mëvonshëm arriti në përfundimin se aktori nuk kishte paraqitur një kundërpadi të vlefshme.
Me shtyrjen e seancës, mbetet të shihet nëse palët do të arrijnë një marrëveshje apo nëse një nga sagat më të komentuara të Hollywood-it do të vazhdojë përpara gjykatës në maj.
