Mona Lisa do të ekspozohet në një dhomë të re të Muzeut të Luvrit, me akses të pavarur nga pjesa tjetër e Muzeut. Kjo u bë e ditur nga presidenti francez, Emmanuel Macron duke folur përballë kryeveprës së Leonardo Da Vinçit.
Dhoma e re do të jetë e aksesueshme në mënyrë të pavarur nga pjesa tjetër e muzeut dhe do të ketë “leje më vete” me një pjesëmarrje ndryshe e më paqësore, si edhe një ekspozitë që do të përshtatet me atë që meriton Mona Lisa, shpjegoi shefi i Elizesë, Macron.
Rinovimi i fundit i madh i Luvrit daton në vitet 1980, kur u inaugurua piramida e famshme e xhamit. Sot, muzeu nuk i plotëson më standardet ndërkombëtare. Gjysma e buxhetit të Luvrit financohet nga shteti francez, duke përfshirë pagat e 2 mijë e 200 punonjësve të tij.
Gjysma tjetër vjen nga fondet private, duke përfshirë të ardhurat nga shitjet e biletave, restorantet, shitjet me pakicë dhe të ardhurat e rezervimit të ngjarjeve speciale, si dhe nga sponsorët dhe partnerët e tjerë, duke përfshirë financimin nga Emiratet e Bashkuara Arabe për përdorimin e markës Louvre Abu Dhabi.
Vitin e kaluar, Luvri priti 8.7 milion vizitorë, më shumë se tre të katërtat e të cilëve ishin të huaj, kryesisht nga Shtetet e Bashkuara të Amerikës, Kina dhe Italia fqinje, Mbretëria e Bashkuar, Gjermania e Spanja po ashtu.
