Këngëtarja britanike Jessie J ka bërë të ditur se i ka dhënë fund lidhjes me basketbollistin Chanan Colman, partnerin me të cilin ndan djalin e tyre, Sky.
Artistja e konfirmoi lajmin gjatë një sesioni pyetje-përgjigje në Instagram, ku iu përgjigj një ndjekësi që e pyeti për statusin e saj sentimental.
Ajo zbuloi se aktualisht është beqare, duke sqaruar se ndarja ka ndodhur në mirëkuptim të plotë.
Jessie theksoi se mes saj dhe Colman nuk ka mosmarrëveshje dhe se të dy kanë zgjedhur të mbajnë një marrëdhënie të shëndetshme për hir të djalit të tyre.
Në aspektin romantik, thjesht nuk funksionoi. Megjithatë, kemi shumë respekt dhe dashuri për njëri-tjetrin. Ai është një njeri i mrekullueshëm dhe kemi vendosur të mbetemi miq
-u shpreh këngëtarja.
Ajo shtoi se, pavarësisht ndarjes, të dy do të vazhdojnë të jenë prindër të përkushtuar dhe do të bashkëpunojnë për ta rritur Sky-n në mënyrën më të mirë të mundshme.
Gjatë bisedës me ndjekësit, Jessie J foli edhe për pikëpamjen e saj ndaj martesës. Artistja tha se nuk e ka konsideruar kurrë martesën si një objektiv jetësor, duke theksuar se një hap i tillë duhet të bëhet vetëm kur gjen personin e duhur.
Sipas saj, në këtë moment ndihet e lumtur me jetën që po bën, ndërsa prioritetet e saj kryesore mbeten djali dhe karriera muzikore.
Jessie J dhe Chanan Colman u bënë prindër të Sky në vitin 2023, ndërsa marrëdhënia e tyre u vlerësua shpesh nga fansat për mbështetjen që i dhanë njëri-tjetrit.
Më herët, këngëtarja kishte rrëfyer se Colman ishte pranë saj gjatë një prej periudhave më të vështira të jetës, pas humbjes së shtatzënisë në vitin 2021, duke e mbështetur në procesin e rikuperimit emocional.
