Aktori dhe komediani britanik Russell Brand ka bërë një deklaratë që ka shkaktuar reagime të forta, gjatë një interviste në emisionin “The Megyn Kelly Show”.
Ai pranoi se në të kaluarën ka pasur një marrëdhënie seksuale me një vajzë 16-vjeçare, në një kohë kur vetë ishte 30 vjeç. Edhe pse theksoi se, në Mbretërinë e Bashkuar, mosha ligjore e pëlqimit është 16 vjeç, Brand e cilësoi këtë përvojë si problematike dhe e përshkroi si “shfrytëzim”.
Kam qenë një person krejt tjetër në atë kohë, shumë i papjekur
-u shpreh ai, duke reflektuar mbi të kaluarën e tij.
Gjatë intervistës, Brand theksoi se edhe marrëdhëniet me pëlqim mund të bëhen të diskutueshme kur ekziston një diferencë e madhe pushteti, veçanërisht kur njëra palë është figurë publike me ndikim.
Sipas tij, fama dhe statusi mund të krijojnë një dinamikë të pabarabartë që çon në situata shfrytëzuese.
Ai pranoi gjithashtu se sjellja e tij në të kaluarën ka qenë egoiste dhe se nuk ka reflektuar mjaftueshëm mbi ndikimin që mund të ketë pasur tek të tjerët.
Ndërkohë, Russell Brand përballet edhe me akuza të rënda ligjore, përfshirë përdhunim dhe sulm seksual ndaj disa grave, për ngjarje që pretendohet të kenë ndodhur ndër vite. Ai i ka mohuar të gjitha akuzat dhe është deklaruar i pafajshëm.
Procesi gjyqësor ndaj tij pritet të zhvillohet në Southwark Crown Court në Londër, me seancat që janë shtyrë dhe tashmë parashikohet të nisin në muajt e ardhshëm.
