Ylli televiziv Khloé Kardashian ka rrëfyer hapur frikën e saj nga Inteligjenca Artificiale, duke thënë se teknologjia e re e tmerron dhe e bën të ndihet thellësisht në siklet.
Në episodin e 25 shkurtit të podkastit të saj Khloé In Wonder Land, 41-vjeçarja tregoi se madje edhe videot e krijuara me IA, ku shfaqet babai i saj i ndjerë duke e puthur në ballë, i japin “të dridhura”.
Babai i saj, Robert Kardashian, ndërroi jetë në shtator 2003 nga kanceri i ezofagut, kur Khloé ishte vetëm 19 vjeç. Edhe pse shumë mund ta shohin si një gjest të ëmbël rikrijimin virtual të momenteve me të, ajo thotë se për të është diçka “e çuditshme” dhe e pakëndshme.
Nuk mund ta shpjegoj. E di që njerëzit mendojnë se është e bukur, por më bën të ndihem në siklet
-u shpreh ajo.
Khloé tregoi gjithashtu se shpesh ngatërrohet kur sheh video të motrave të saj në internet, pasi nuk arrin të dallojë nëse janë reale apo të manipuluara me IA.
Nëntë herë nga dhjetë nuk janë të vërteta. Kjo është e frikshme
-tha ajo, duke shtuar se familja e saj shpesh kontakton krijuesit për t’u kërkuar heqjen e materialeve të rreme.
Ajo madje pranoi se ka frikë edhe nga platformat e inteligjencës artificiale si ChatGPT, duke thënë me humor:
Nuk po flas me ty sepse do të kujtosh gjithçka që them.
Në të njëjtin episod, Khloé foli edhe për mënyrën si i mban fëmijët e saj larg mediave sociale. Vajza e saj 7-vjeçare, True, dhe djali 3-vjeçar, Tatum, nuk janë të vetëdijshëm për trendet në TikTok.
Ata mendojnë se TikTok do të thotë thjesht një video vallëzimi. Ne bëjmë video duke kërcyer në shtëpi dhe kaq
-tha ajo.
Për Khloé-n, interneti ka qenë gjithmonë sfidues, por zhvillimi i Inteligjencës Artificiale e ka bërë edhe më të vështirë të besojë atë që sheh online.
