Keira Knightley dhe bashkëshorti i saj, James Righton, kanë zgjedhur një nga skenat më publike për të treguar se martesa e tyre vazhdon të jetë e fortë, duke u shfaqur të buzëqeshur dhe të kapur për dore gjatë një daljeje romantike në Wimbledon.
Çifti tërhoqi vëmendjen teksa mbërriti në All England Club për të ndjekur ndeshjen mes tenistit britanik Arthur Fery dhe Alexander Zverev në fushën qendrore të turneut prestigjioz.
Aktorja 41-vjeçare dhe muzikanti dukej se po shijonin çdo moment së bashku, ndërsa gjatë sfidës reaguan me entuziazëm ndaj pikave më emocionuese të ndeshjes.
Paraqitja e tyre publike vjen pas muajsh spekulimesh për një krizë të mundshme në marrëdhënien e tyre. Thashethemet nisën pasi Keira hoqi mbiemrin e bashkëshortit nga disa dokumente zyrtare, ndërsa James u fotografua pa unazën e martesës.
Megjithatë, këto dyshime u hodhën poshtë më vonë, pasi çifti u shfaq sërish së bashku me unazat e martesës në duar. Përfaqësuesit e aktores sqaruan gjithashtu se ndryshimi i emrit lidhej vetëm me procedura të reja administrative për verifikimin e identitetit dhe nuk kishte lidhje me jetën e saj private.
Për daljen në Wimbledon, Keira zgjodhi një pamje elegante verore, me një fustan të bardhë midi nga Ralph Lauren, të kombinuar me sandale delikate dhe aksesorë minimalistë.
James Righton u shfaq me një kostum gri të çelët, këmishë rozë dhe mokasina në nuanca krem, duke kompletuar një paraqitje klasike.
Çifti, i cili u martua në vitin 2013 dhe ka dy vajza së bashku, duket se ka lënë pas çdo spekulim, duke treguar publikisht afërsinë dhe harmoninë mes tyre.
