Kim Kardashian është vënë në qendër të kritikave nga tifozët e Formula 1 pasi refuzoi të ndalonte për një intervistë me gazetarin dhe ish-pilotin legjendar Martin Brundle gjatë Çmimit të Madh të Monakos.
Ylli i reality show-ve ishte e pranishme në garën prestigjioze për të mbështetur partnerin e saj, pilotin e Formula 1, Lewis Hamilton.
Gjatë turit tradicional në pistë për “Sky Sports”, Brundle iu afrua Kim dhe motrës së saj, Khloe Kardashian, për një intervistë të shkurtër, por dyshja duket se nuk pranoi të ndalonte për të biseduar.
Momenti u bë shpejt viral në rrjetet sociale, duke nxitur reagime të shumta nga fansat e sportit motorik, të cilët e konsideruan sjelljen e saj mungesë respekti ndaj një prej figurave më të njohura të Formula 1.
A është Kim Kardashian aq e rëndësishme sa nuk mund të flasë me Martin Brundle? Mungesë totale elegance
-shkroi një përdorues në rrjetet sociale.
Një tjetër komentues ishte edhe më i ashpër, duke thënë:
Ajo është e famshme vetëm sepse është e famshme. Ndërkohë injoron një njeri që është legjendë e këtij sporti. Nuk ka vend në vijën e startit të Formula 1.
Reagimet nuk u ndalën me kaq. Disa tifozë kërkuan që personazhet e famshëm që nuk tregojnë interes apo respekt për sportin të mos kenë akses në zonat ekskluzive të garave.
Formula 1 duhet të ndalojë njerëzit që tregojnë mungesë respekti ndaj sportit dhe njerëzve që e kanë ndërtuar atë. Nëse nuk e respekton Formula 1, nuk ke pse të jesh aty
-shkroi një tjetër shikues.
Incidenti riktheu në vëmendje segmentet e famshme të Martin Brundle në pistë, të cilat prej vitesh janë bërë pjesë e pandashme e fundjavave të Formula 1 dhe shpesh prodhojnë momente virale me personazhe të njohur.
Pavarësisht kritikave, Kim Kardashian nuk ka reaguar publikisht lidhur me situatën, ndërsa vëmendja mbetet e përqendruar te marrëdhënia e saj me Lewis Hamilton, e cila vazhdon të jetë një nga temat më të diskutuara në mediat rozë.
