Edhe pse jemi mësuar të besojmë se një ditë ka 24 orë – ose 86,400 sekonda – realiteti është pak më kompleks. Rrotullimi i Tokës rreth boshtit të saj nuk është i qëndrueshëm dhe kohët e fundit, ky ndryshim ka nisur të bëhet më i ndjeshëm se kurrë më parë.
Shkencëtarët kanë zbuluar se gjatë epokës së dinosaurëve, një ditë zgjaste rreth 23 orë. Me kalimin e miliona viteve, rrotullimi i Tokës është ngadalësuar në mënyrë natyrale për shkak të ndikimeve gravitacionale – veçanërisht nga Hëna. Por që nga viti 2020, për herë të parë, planeti ynë ka nisur të rrotullohet më shpejt.
Ky fenomen i pazakontë ka alarmuar komunitetin shkencor, pasi mund të çojë në një ndryshim historik në kohëmatje: në vend që të shtojmë një sekondë për të ruajtur përputhjen me kohën atomike – siç është bërë më parë – mund të kemi nevojë të heqim një sekondë, për herë të parë në histori.
Sipas të dhënave më të fundit, dita më e shkurtër e vitit 2025 pritet të jetë më 5 gusht, dhe do të jetë rreth 1.51 milisekonda më e shkurtër se mesatarja. Edhe 9 dhe 22 korriku do të jenë ndër ditët më të shkurtra të vitit.
Ekspertët besojnë se ky përshpejtim mund të shkaktohet nga një kombinim faktorësh – që nga forcat gravitacionale, te aktivitetet sizmike, shpërthimet vullkanike apo ndryshimet në bërthamën e Tokës.
Disa studiues madje dyshojnë se një proces i panjohur në brendësinë e planetit mund të jetë duke ndikuar në këtë ritëm të ri.
Nëse ky trend vazhdon, në një të ardhme shumë të largët dita mund të zgjatet deri në 25 orë. Por për momentin, koha – sado e paprekshme të duket – është duke rrjedhur… pak më shpejt se zakonisht.
