Koreja e Veriut është gati të trefishojë numrin e trupave të saj që luftojnë për Rusinë përgjatë vijës së frontit me Ukrainën, duke dërguar 25,000-30,000 ushtarë shtesë për të ndihmuar Moskën, raporton CNN, me një vlerësim të inteligjencës të kryer nga zyrtarët ukrainas.
Trupat mund të mbërrijnë në Rusi në muajt e ardhshëm, duke iu shtuar 11,000 të dërguarve në nëntor për të zmbrapsur inkursionin ukrainas në rajonin Kursk të Rusisë. Rreth 4,000 prej këtyre ushtarëve të Koresë së Veriut u vranë ose u plagosën gjatë vendosjes, sipas burimeve perëndimore.
SHBA-të kanë ndaluar disa dërgesa armësh drejt Kievit, ndërsa forcat ruse intensifikojnë luftën kundër Ukrainës. Shtëpia e Bardhë tha se vendimi u mor “për të vënë interesat e Amerikës në vend të parë” pas një shqyrtimi nga Departamenti i Mbrojtjes për mbështetjen ushtarake amerikane për vendet e tjera.
Shtetet e Bashkuara i kanë dërguar dhjetëra miliarda dollarë ndihmë ushtarake Ukrainës që kur Rusia nisi pushtimin e saj në shkallë të plotë në shkurt 2022, duke bërë që disa në administratën Trump të shprehin shqetësime se rezervat amerikane janë shumë të ulëta.
“Ky vendim u mor për të vënë interesat amerikane në plan të parë pas një shqyrtimi të Departamentit të Mbrojtjes të mbështetjes dhe ndihmës ushtarake të vendit tonë për vendet e tjera anembanë botës. Fuqia e ushtrisë amerikane mbetet e padiskutueshme – thjesht pyeteni Iranin”, tha zëdhënësja e Shtëpisë së Bardhë Anna Kelly në një deklaratë.
