Kryeministri i vendit, Albin Kurti, u ka thënë ambasadorëve të vendeve të QUINT-it se marrëveshja me Serbinë, si dhe aneksi i dakorduar, duhet të zbatohen pa kushte.
Ai ka pritur në takim ambasadorët e akredituar në Kosovë ku ka përmendur nevojën që Bashkimi Evropian të mbajë përgjegjëse Serbinë për shkeljet e vazhdueshme që po i bën marrëveshjes.
“Në takim u diskutua për procesin e dialogut dhe zbatimin e Marrëveshjes Bazë me Serbinë dhe Aneksin e Zbatimit nga takimi i 27 shkurtit në Bruksel dhe ai i 18 marsit në Ohër ndërmjet të dyja shteteve. Kryeministri Kurti dhe zëvendëskryeministri Bislimi theksuan se Marrëveshja Bazë dhe Aneksi i Zbatimit duhet të zbatohen pa kushte, pa vonesa dhe në mënyrë të plotë. Gjithashtu, u përmend nevoja që BE-ja ta mbajë përgjegjëse Serbinë për shkeljet e vazhdueshme që po i bën marrëveshjes”, shkruan Kosovapress.
Të hënën në Bruksel do të takohen kryenegociatorët e Kosovës dhe të Serbisë, takim ky që sipas Qeverisë do të ketë në fokus zbatimin e sekuencuar të marrëveshjes bazë dhe të aneksit.
Asociacioni duhet t’i përmbahet parimeve që kanë paraqitur të dërguarit e SHBA-së dhe Ballkanit, kështu deklaroi administratorja e Agjencisë Amerikane për Zhvillim Ndërkombëtar, Samantha Power.
Në vizitën e saj në Kosovë, ajo dha mesazhet e qeverisë së Biden, për dialogun me Serbinë dhe marrëveshjen e fundit të arritur mes dy vendeve.
Power theksoi se marrëveshja duhet të zbatohet në tërësi, njëkohësisht duhet të nisë themelimi për Asociacionin e komunave me shumicë serbe në Kosovë.
“Kemi pasur diskutime edhe për urgjencën e krijimit të Asociacionit, por edhe zbatimit të plotë të gjitha aspekteve të marrëveshjes. Ne e kemi bërë shumë të qartë përmes Chollet dhe Escobar se cilat janë parimet dhe po ashtu besojmë se çdo asociacion do t’iu përmbahet atyre kushteve”, tha Samantha Power – Administratorja e Agjencisë Amerikane për Zhvillim Ndërkombëtar.
Në konferencën e përbashkët me kryeministrin Albin Kurti, ajo shtoi se dialogu duhet të përfundojë me njohje reciproke, por fokusi është normalizimi i marrëdhënieve Kosovë-Serbi.
“Fokusi ynë është në implementimin e kornizës së plotë të normalizimit. Gjithmonë ka qenë pozicioni i ShBA-ve që kjo duhet të përfundojë me njohje reciproke dhe ky mbetet qëndrimi ynë. Por tani fokusi ynë është në rëndësinë e Asociacionit dhe rëndësinë që serbët e Kosovës të kthehen në institucionet e Kosovës sa më parë që të jetë e mundur”, shtoi më tej ajo.
Në janar të këtij viti, këshilltari i Departamentit Amerikan të Shtetit, Derek Chollet, dhe i dërguari për Ballkanin, Gabriel Escobar, kanë paraqitur qëndrimin e tyre për përmbajtjen e Asociacionit.
