Qeveria franceze ka rritur përpjekjet e saj për t’i mbajtur adoleshentët larg rrjeteve sociale, para se të mbushin 15 vjeç. Parisi tashmë ka një projektligj kombëtar që i pengon përdoruesit nën moshën 15 vjeç të hyjnë në platformat e mediave sociale, por po u bën thirrje vendeve anëtare të Bashkimit Evropian për të dalë me një zgjidhje në mbarë bllokun. Qeveria franceze i ka kërkuar Polonisë, e cila do të marrë Këshillin e radhës të presidencës së BE-së në janar, të marrë masa për këtë çështje.
“BE-ja duhet të ndjekë shembullin e Australisë, e cila ka vendosur një ndalim të mediave sociale për moshat nën 16 vjeç”-tha ministrja franceze e Arsimit, Anne Genetet. Thirrja e saj vjen në një kohë kur ka një shqetësim në rritje midis politikanëve evropianë për platformat e mediave sociale, tiparet e tyre të varësisë dhe rolin e tyre në krizat e shëndetit mendor të adoleshentëve. Mund të shfaqet në fazën tjetër të goditjes rregullatore të BE-së ndaj kompanive të teknologjisë.
“Ne do të dëshironim që diçka shumë e ngjashme të mund të vihej në vend, të zbatohej në Evropë”-tha Genetet, duke iu referuar shembullit të Australisë. Ajo shtoi se çështja ishte një emergjencë dhe se urgjentisht duhet vendosur diçka. Ndërkaq, qeveria e Australisë është zotuar të prezantojë atë që e përshkroi si legjislacion “udhëheqës në botë” për të ndaluar fëmijët nën moshën 16 vjeç nga rrjetet sociale. “Rrjetet sociale po u bëjnë dëm fëmijëve tanë”-tha kryeministri australian Anthony Albanese.
“Kam folur me mijëra prindër, gjyshër, halla dhe xhaxhallarë. Ata, si unë, janë të shqetësuar për sigurinë e fëmijëve tanë në internet”-shtoi ai. Bëhet e ditur se legjislacioni do të futet në parlamentin e vendit gjatë dy javëve të fundit të sesionit të këtij viti, duke filluar nga 18 nëntori. Albanese tha se kufiri i moshës do të hyjë në fuqi një vit pasi të miratohet ligji me platforma duke përfshirë Facebook, Instagram, X dhe TikTok. Edhe YouTube ka të ngjarë të jetë gjithashtu brenda fushëveprimit të legjislacionit, ka njoftuar ministrja e Komunikimit e Australisë, Michelle Rowland. Platformat do të penalizohen për shkelje të kufirit të moshës, por fëmijët e mitur dhe prindërit e tyre jo. Nuk do të ketë përjashtime për fëmijët që kanë pëlqimin e prindërve, ose që kanë tashmë llogari.
