Një nga ajsbergët më të mëdhenj dhe më jetëgjatë që është regjistruar ndonjëherë, i njohur si A23a, po hyn në fazën e fundit të ekzistencës së tij pas gati katër dekadash në oqean. Pamje të reja satelitore tregojnë se struktura e tij masive është kthyer në një sipërfaqe me vija blu të theksuara, shenjë e qartë e shkrirjes dhe fragmentimit të avancuar. Sipas vëzhgimeve shkencore, ngjyrat blu të ndezura formohen kur akulli i vjetër dhe shumë i ngjeshur fillon të shpërbëhet, duke lejuar që uji i shkrirë të depërtojë në çarje dhe të ndryshojë mënyrën se si drita reflektohet në sipërfaqe.
Ky proces tregon se ajsbergu ka humbur stabilitetin dhe nuk pritet të mbijetojë për shumë kohë. A23a u shkëput nga kontinenti i Antarktidës në vitet ’80 dhe për dekada me radhë mbeti një masë gjigante akulli që lëvizte ngadalë nëpër ujërat e ftohta jugore. Për një periudhë të gjatë ai konsiderohej ajsbergu më i madh në botë, duke u bërë objekt studimi për shkencëtarët që ndjekin ndryshimet klimatike dhe ciklin jetësor të akullit polar.
Ekspertët theksojnë se zhdukja e A23a nuk është një ngjarje e papritur, por pjesë e procesit natyror të shpërbërjes së ajsbergëve. Megjithatë, fakti që një masë kaq e madhe dhe jetëgjatë po shkrin ka tërhequr vëmendje të veçantë, sidomos në kontekstin e ngrohjes globale dhe ndryshimeve të shpejta që po prekin rajonet polare.
Ndërkaq, në akullnajë në Antarktidë humbi gati gjysmën e gjatësisë së saj në vetëm dy muaj, tërheqja më e shpejtë e regjistruar ndonjëherë, sipas një studimi të botuar në “Nature Geoscience”. Studiuesit zbuluan se akullnaja Hektoria, e vendosur në gadishullin lindor të Antarktidës, u tërhoq rreth 8.2 kilometra midis nëntorit dhe dhjetorit të vitit 2022. Akullnaja humbi gjithashtu gati 25 kilometra në total midis janarit 2022 dhe marsit 2023.
