Rihanna dëshmoi edhe një herë pse konsiderohet një nga yjet më të qeta dhe me sens humori në industrinë e showbiz-it. Një moment i papritur, i filmuar jashtë hotelit luksoz Four Seasons në Nju Jork, është bërë viral në rrjetet sociale dhe ka fituar menjëherë zemrat e fansave.
Ngjarja ndodhi të premten, më 16 janar, teksa këngëtarja po largohej nga hoteli nën shoqërinë e stafit të saj të sigurisë. Në një çast të papritur, dera u mbyll pas truprojës që po ecte përpara, duke e lënë Rihannën për disa sekonda jashtë.
Në vend që të nervozohej, artistja 37-vjeçare reagoi me humor, duke thënë me ironi: “Sa zotëri që je”, përpara se të shpërthente në të qeshura dhe të hipte qetësisht në makinën që e priste.
Videoja u shpërnda me shpejtësi në rrjetet sociale, ku fansat e përgëzuan për thjeshtësinë dhe mënyrën sportive se si e trajtoi situatën, duke e cilësuar si një tjetër dëshmi të karakterit të saj natyral dhe të pandikuar nga fama.
Ky moment i viralizuar përkoi me një ditë të rëndësishme edhe për partnerin e saj, A$AP Rocky, i cili po atë ditë publikoi albumin e tij të katërt, Don’t Be Dumb.
Vetëm një ditë më pas, reperi u shfaq si i ftuar muzikor në emisionin Saturday Night Live, ndërsa çifti u pa së bashku edhe në festën pas shfaqjes.
Në një intervistë për New York Times Popcast, A$AP Rocky foli hapur për lidhjen me Rihannën, duke zbuluar se ishte nëna e tij ajo që e kishte inkurajuar të ndiqte këngëtaren.
Ai e përshkroi Rihannën si një grua shumë të veçantë dhe theksoi se lidhja e tyre ndodhi në momentin e duhur për të dy.
Rihanna dhe A$AP Rocky janë prindër të tre fëmijëve dhe së fundmi këngëtarja ka lënë të kuptohet se familja e tyre mund të zgjerohet edhe më tej, duke mos përjashtuar mundësinë e ardhjes në jetë të një fëmije të katërt.
