Rikthimi i Rihanna-s në skenë pas më shumë se dy vitesh u prit me entuziazëm nga mijëra fansa në Yankee Stadium në New York, por jo të gjithë mbetën të impresionuar nga performanca e saj.
Këngëtarja bëri një paraqitje surprizë në natën përmbyllëse të serisë së koncerteve të Jay-Z, ku interpretoi hitin e përbashkët “Run This Town”, përpara se të këndonte edhe këngën e saj “B**** Better Have My Money”, shkruan DailyMail.
Megjithatë, menjëherë pas performancës, rrjetet sociale u mbushën me reagime të ndara. Ndërsa shumë e cilësuan rikthimin e saj si një moment të veçantë, të tjerë kritikuan mungesën e energjisë në skenë.
Disa përdorues e përshkruan interpretimin si “të vakët”, “pa entuziazëm” dhe madje “të dembelosur”, duke thënë se prisnin shumë më tepër nga një prej yjeve më të mëdhenj të muzikës pop.
Kritikat nuk u ndalën vetëm te Rihanna. Një pjesë e publikut u ankua edhe për organizimin e koncertit, duke pretenduar se Jay-Z doli në skenë rreth tre orë me vonesë, gjë që shkaktoi pakënaqësi te shumë të pranishëm.
Pavarësisht komenteve negative, performanca e Rihanna-s u bë një nga momentet më të komentuara të mbrëmjes, pasi ishte paraqitja e saj e parë live që nga spektakli i pjesës së parë të Super Bowl LVII në vitin 2023.
Koncerti ishte pjesë e serisë së tre netëve të organizuara nga Jay-Z në Yankee Stadium për të festuar përvjetorët e albumeve të tij më të rëndësishme. Gjatë këtyre mbrëmjeve, në skenë u ngjitën edhe emra të mëdhenj si Beyoncé, Blue Ivy Carter, Pharrell Williams, Nas, Eminem dhe Alicia Keys.
