Debbie McWilliams, drejtoresha legjendare e kastingut për filmat e James Bond, ka dhënë një mendim të prerë për aktorin që duhet të interpretojë agjentin e ri 007, duke deklaruar se roli nuk duhet t’i besohet emrave më të përfolur të momentit.
McWilliams, e cila punoi për gati katër dekada në filmat e Bond, nga “For Your Eyes Only” (1981) deri te “No Time To Die” (2021), tha se aktorë si Jacob Elordi, Callum Turner dhe Harris Dickinson nuk janë zgjedhja e duhur për personazhin ikonik.
Ish-drejtoresha e kastingut, e cila ishte përgjegjëse për përzgjedhjen e Timothy Dalton, Pierce Brosnan dhe Daniel Craig, doli në pension përpara se Amazon të merrte kontrollin krijues të ekskluzivitetit. Tashmë, procesi i përzgjedhjes së Bondit të ri drejtohet nga Nina Gold dhe regjisori Denis Villeneuve.
Nuk dua të shoh asnjërin prej tyre si James Bond. Është absolutisht thelbësore që Bondi të mbetet një enigmë e plotë. Nuk dua të shoh asnjërin prej tyre si Bond sepse dimë kaq shumë për ta tani. Duam të dimë sa më pak për ta personalisht sepse janë spiunë. Nuk kemi nevojë të dimë se ku shkon për pazar ose kush janë prindërit e tij ose ku jeton. Nuk duam ta shohim kurrë në shtëpi. Elementi kyç i gjithë kësaj është përshkrimi i punës së tij. Ai ka leje për të vrarë dhe ne duhet të besojmë se mund ta bëjë. Nëse nuk e besoni, atëherë e keni humbur audiencën
-u shpreh McWilliams.
Ajo kujtoi se edhe aktorët që kanë interpretuar më parë agjentin 007 nuk ishin yje të mëdhenj kur morën rolin.
Timothy dhe Pierce nuk ishin veçanërisht të njohur. Daniel kishte një karrierë në filma të pavarur më parë dhe një jetë romantike mjaft të gjallë, por ai nuk ishte një emër i njohur dhe kjo ndihmon shumë. Dua të shoh dikë që është krejtësisht i papritur
-tha ajo.
McWilliams komentoi edhe debatin e kahershëm nëse James Bond duhet të interpretohet nga një grua, duke theksuar se, sipas saj, personazhi duhet të mbetet besnik ndaj vizionit origjinal të autorit Ian Fleming.
Kështu e shkroi Ian Fleming. Pse do të donit ta ndryshonit këtë? Ata nuk e ndryshuan Harry Potter në Alice Potter ose në një etni tjetër. Kështu u shkrua dhe besoj se duhet të mbetet kështu
-deklaroi ajo.
Ndërkohë, Amazon konfirmoi në muajin maj se procesi për gjetjen e aktorit të ri që do të veshë kostumin e James Bond ka nisur zyrtarisht.
Ndërsa nuk planifikojmë të komentojmë mbi detaje specifike gjatë procesit të përzgjedhjes së aktorëve, jemi të emocionuar të ndajmë më shumë lajme me fansat kur të vijë koha e duhur
-bëri të ditur studioja.
Filmi i 26-të i James Bond do të drejtohet nga Denis Villeneuve. Kastingu po udhëhiqet nga Nina Gold, ndërsa producentë janë Amy Pascal dhe David Heyman. Skenari është shkruar nga Steven Knight, krijuesi i serialit të njohur “Peaky Blinders”.
