Fansat e sagës së famshme të “James Bond” do të duhet të presin shumë më gjatë se sa pritej, pasi filmi i ri raportohet se nuk do të publikohet para vitit 2028, duke shënuar kështu pauzën më të gjatë në historinë e ekskluzivitetit.
Sipas raportimeve, nëse produksioni publikohet në pranverën e 2028, do të ketë kaluar rreth shtatë vite nga filmi i fundit “No Time to Die”, duke krijuar një rekord të ri pritjeje për fansat e agjentit 007.
Pas largimit të Daniel Craig nga roli i Bondit, ende nuk është konfirmuar zyrtarisht se kush do ta marrë mantelin e agjentit sekret.
Filmi i ri do të drejtohet nga regjisori i njohur Denis Villeneuve, i cili ka marrë vlerësime ndërkombëtare për projektet e tij si “Dune”, ndërsa skenari do të shkruhet nga Steven Knight.
Burime pranë produksionit thonë se vonesa lidhet me dëshirën për të sjellë një film të realizuar me kujdes maksimal dhe standarde të larta cilësie, duke e bërë rikthimin e Bondit një projekt të madh dhe ambicioz.
Ndërkohë, në rrjet po qarkullojnë emra të ndryshëm si kandidatë për rolin legjendar të 007, mes tyre Aaron Taylor-Johnson, Theo James, Jacob Elordi, Callum Turner dhe Harris Dickinson.
Për momentin, fansat duhet të pajtohen me një gjë: Bond po vonohet më shumë se kurrë më parë.
