Oprah Winfrey ka bërë një rrëfim që po ndryshon rrënjësisht mënyrën se si flasim për peshën, trupin dhe fajin personal. Ikona 71-vjeçare e medias ka deklaruar se për dekada të tëra ka jetuar me një bindje të gabuar: se obeziteti ishte pasojë e të ngrënit të tepërt.
Sot, ajo thotë të kundërtën, obeziteti është ai që nxit të ngrënit e tepërt.
Në një intervistë të hapur, Oprah foli për betejën e saj shumëvjeçare me peshën, e cila në kulmin e saj arriti mbi 16 stone, ndërsa trupi i saj u kthye në temë talljeje dhe kritike publike.
Ajo e përshkruan këtë obsesion kolektiv me trupin e saj si një plagë emocionale që e shoqëroi për dekada.
Arrita ta kuptoj se të ngrënit e tepërt nuk shkakton obezitet. Obeziteti shkakton të ngrënit e tepërt
-u shpreh ajo, duke theksuar se për njerëzit me predispozitë gjenetike, kjo nuk është çështje mungese vullneti.
Dua që njerëzit ta dinë se nuk është faji i tyre.
Oprah kujtoi edhe një moment traumatizues nga vitet ’90, kur një kritike mode e përshkroi trupin e saj si “me gunga dhe me pupla”, një koment që, sipas saj, e përforcoi turpin dhe idenë se gjithçka varej vetëm nga vetëkontrolli.
Pikëkthesa erdhi në vitin 2023, kur ajo vendosi të rishikojë qëndrimin e saj ndaj medikamenteve për humbje peshe, pas vitesh rezistence të ushqyer nga fajësimi i vetes.
Oprah pranoi se gjithmonë kishte besuar se disiplina dhe forca e vullnetit duhej të mjaftonin.
Mendova se gjithçka kishte të bënte me disiplinën. Por ndalova së fajësuari veten
-tha ajo.
Sot nuk e ndëshkoj më veten. Dhe jam një grua e lumtur.
Ajo shpjegoi se trupi i saj, pavarësisht dietave ekstreme dhe ecjeve deri në 16 kilometra në ditë, kthehej vazhdimisht rreth të njëjtës peshë.
Sipas bashkautores së saj, Dr. Ania Jastreboff, kjo lidhet me atë që quhet “pika e mjaftueshme” e trupit, një diapazon peshe i përcaktuar gjenetikisht, të cilin trupi përpiqet ta mbrojë.
Injeksionet javore, sipas Oprah, e kanë ndihmuar të qetësojë sinjalet e brendshme të urisë dhe obsesionin e vazhdueshëm me ushqimin, duke i dhënë për herë të parë ndjesinë e kontrollit pa ndëshkim.
Ajo ka pranuar se planifikon të vazhdojë trajtimin për një kohë të gjatë, duke e kombinuar me ushqyerje të shëndetshme dhe aktivitet fizik, dhe e përshkroi mbështetjen mjekësore si një “lehtësim të madh”.
Historia e Oprah Winfrey nuk është më vetëm për humbjen e peshës, por për çlirimin nga faji.
Një rrëfim që po hap një debat të ri global: a kemi qenë duke e fajësuar gabim veten për diçka që është, në thelb, biologjike?
