Nespulla, një frut me origjinë nga Japonia, po shfaqet më herët këtë vit në tregjet shqiptare për shkak të temperaturave të larta në muajt shkurt dhe mars.
E njohur për aromën magjepsëse dhe shijen unike mes pjeshkës, mangos dhe mollës, kjo pemë shumëvjeçare jo vetëm zbukuron oborret, por ofron edhe përfitime të shumta shëndetësore.
E pasur me ujë, fibra, vitamina (A, B, C), minerale si kalium, kalçium, zink, si dhe acide Omega-3 e Omega-6, nespulla ndihmon në uljen e temperaturës, pastrimin e rrugëve urinare, rregullimin e tretjes dhe presionit të gjakut, si dhe në përmirësimin e metabolizmit dhe shikimit.
Gjethet e saj përdoren prej kohësh në mjekësinë popullore për qetësimin e sistemit nervor dhe trajtimin e sëmundjeve të lëkurës.
Megjithatë, duhet pasur kujdes me farat e frutit, pasi ato përmbajnë substanca toksike që mund të shkaktojnë të vjella dhe marramendje, veçanërisht tek fëmijët.
