Kantautori i famshëm britanik Ed Sheeran ka befasuar fansat me paraqitjen e tij në kopertinën më të fundit të Men’s Health UK, ku shfaqet pa bluzë dhe me një formë fizike krejtësisht ndryshe.
Artisti 34-vjeçar ka humbur plot 14 kilogramë gjatë pesë viteve të fundit, një transformim që ai e lidh drejtpërdrejt me atësinë dhe ndryshimin rrënjësor të stilit të jetesës.
Sheeran rrëfen se gjithçka ndryshoi pas lindjes së vajzës së tij të parë, Lyra. Vetëm dy javë pasi u bë baba, një mbrëmje me alkool e bëri të ndihej keq kur u zgjua natën për vajzën, duke e shtyrë të marrë një vendim të fortë: t’i thotë lamtumirë pijes.
Sot, me dy vajza, Lyra dhe Jupiter, këngëtari thotë se motivimi kryesor është të jetë një baba i shëndetshëm dhe energjik. Ai nisi stërvitjen gjatë pandemisë, fillimisht me ecje, për të kaluar më pas në pilates, pesha dhe vrapim, nën kujdesin e një trajneri personal.
Ndryshe nga më parë, Ed Sheeran nuk feston më nëpër bare pas koncerteve. Tani ai zgjedh darka të qeta, masazhe dhe pushim, duke theksuar se kjo rutinë e re jo vetëm e ka transformuar trupin e tij, por ka përmirësuar edhe zërin, energjinë dhe shëndetin e përgjithshëm.
