Presidenti amerikan, Donald Trump, i cili ka lobuar fort në NATO për të rritur objektivat e shpenzimeve të mbrojtjes në 5% të Prodhimit të Brendshëm Bruto (PBB), tha se të gjitha vendet anëtare të NATO-s duhet ta përmbushin këtë objektiv përveç Shteteve të Bashkuara të Amerikës.
I pyetur nga një gazetar përpara samitit të NATO-s javën e ardhshme në Hagë, Trump u shpreh se anëtarët e tjerë duhet të paguajnë më shumë sepse kanë shpenzuar shumë për një kohë të gjatë, siç theksoi “në kurriz të shpenzimeve të mbrojtjes së SHBA-ve”.
Mendoj se duhet ta bëjnë këtë. Ne e kemi mbështetur NATO-n për kaq kohë. Në shumë raste, besoj, duke paguar pothuajse 100% të kostove, kështu që mendoj se vendet e NATO-s duhet ta bëjnë, absolutisht.
Trump veçoi Spanjën e Kanadanë si vende me pagesa veçanërisht të ulëta.
NATO duhet të merret me Spanjën. Vendi duhet të paguajë atë që të gjithë të tjerët duhet të paguajnë.
Përmes një letre, dy ditë më parë, kryeministri spanjoll, Pedro Sánchez informoi Sekretarin e Përgjithshëm të NATO-s, Mark Rutte, për kundërshtimin e vendit të tij ndaj objektivit të ri prej 5%. Sa i përket fqinjit verior të SHBA-ve, presidenti Trump deklaroi se Kanadaja “është pothuajse më e ulëta” kur bëhet fjalë për kontributet në NATO.
Ata kanë thënë pse duhet të paguajmë kur Shtetet e Bashkuara do të na mbrojnë falas?
Me ironi, Trump komentoi se “Kanadaja kishte kryesisht të drejtë”. Nën presionin e Trump-it, pritet që Aleanca të bjerë dakord në samitin e javës së ardhshme për të investuar të paktën 3,5% të PBB-së kombëtare për mbrojtjen në të ardhmen.
Një shtesë prej 1,5% do të ndahet për shpenzime që lidhen me mbrojtjen, siç është infrastruktura. Kjo do ta çonte totalin në një kuotë prej 5%, të cilën Trump e ka kërkuar prej kohësh.
