Vazhdojnë vuajtjet e banorëve të Rripit të Gazës. Pavarësisht se kamionë me ndihma humanitare kanë hyrë në enklavë, shpërndarja nuk ka filluar ende, ndërsa bombardimet e rënda izraelite po shkaktojnë dhjetëra të vrarë dhe të plagosur.
Më shumë se një muaj pasi ndaloi hyrjen e çdo ndihme humanitare më 2 mars, qeveria izraelite njoftoi hyrjen e 93 kamionëve të OKB-së me ushqime në Rripin e Gazës, në mes të luftës që tani është në muajin e saj të 20-të.
Siç denoncon OKB-ja, pavarësisht faktit se kamionët kanë kaluar në anën palestineze të pikës kufitare Kerem Shalom, deri më tani nuk është shpërndarë asnjë ndihmë. Zëdhënësi i OKB, Stephane Dujarric, tha se një ekip priti për disa orë që Izraeli t’u lejonte atyre qasje në zonë.
Dujarric tha se operacioni i ndihmës u bë “i ndërlikuar” pasi Izraeli kërkoi që OKB-ja “të shkarkonte furnizimet në anën palestineze të pikës kalimtare Kerem Shalom dhe t’i ngarkonte ato veçmas pasi të siguronin akses për ekipet nga brenda Rripit të Gazës”.
Edhe pse ai e quajti mbërritjen e ndihmës humanitare një zhvillim pozitiv, ai e përshkroi atë si “një pikë uji në oqeanin e asaj që nevojitet”. Agjencitë e OKB-së vlerësojnë se nevojiten 600 kamionë në ditë për të filluar adresimin e krizës kronike humanitare në Gaza.
Reagimi i bashkësisë ndërkombëtare
Përballë situatës katastrofike humanitare dhe përshkallëzimit të operacioneve ushtarake izraelite në enklavë, disa qeveri evropiane po ndërmarrin iniciativa për të ushtruar presion mbi Izraelin.
Bashkimi Evropian njoftoi se do të fillojë një proces rishikimi të marrëveshjes së asociimit që ka nënshkruar me Izraelin, e cila ka qenë në fuqi që nga viti 2000. Ky vendim u mbështet nga 17 shtete anëtare, sipas Parisit.
Britania, nga ana e saj, njoftoi pezullimin e negociatave me Izraelin për të përfunduar një marrëveshje të tregtisë së lirë.
Nga ana e tij, Sekretari i Shtetit i SHBA-së, Marco Rubio, vendi i të cilit është aleati kryesor ndërkombëtar i Izraelit, tha se ishte “i lumtur” që “ndihma ka rifilluar të hyjë” në Rripin e Gazës, megjithëse pranoi se sasia nuk është e mjaftueshme.
Zemërim nga qeveria e Netanyahut
Duke reaguar ndaj njoftimit të Londrës, Ministria e Jashtme izraelite theksoi se “presionet e jashtme nuk do ta devijojnë Izraelin nga rruga e mbrojtjes së ekzistencës dhe sigurisë së tij”.
Sa i përket njoftimit të znj. Kalas, ai “pasqyron një keqkuptim të plotë të realitetit kompleks me të cilin përballet Izraeli” dhe “inkurajon Hamasin”, tha një zëdhënës diplomatik izraelit vonë në mbrëmjen e së martës (20/5).
Bastisja e Hamasit në Izraelin jugor më 7 tetor 2023 kushtoi jetën e 1,218 personave në anën izraelite, shumica e të cilëve civilë, duke çuar në hakmarrje të ashpër izraelite, duke përfshirë një “ngrirje” të shpërndarjes së ndihmës humanitare. Nga 251 personat e rrëmbyer, 57 mbeten në duart e grupeve të armatosura palestineze në Gaza, por 34 prej tyre janë shpallur të vdekur nga ushtria izraelite.
Operacionet hakmarrëse ushtarake izraelite në shkallë të gjerë kanë marrë që atëherë jetën e të paktën 53,573 personave në Rripin e Gazës, shumica e të cilëve civilë, sipas të dhënave më të fundit nga Ministria e Shëndetësisë e qeverisë së Hamasit në enklavën palestineze, e cila konsiderohet e besueshme nga OKB-ja.
