Një pensioniste nga Zvicra ka rënë viktimë e një mashtrimi të sofistikuar, duke besuar se ishte në një lidhje me aktorin e famshëm Brad Pitt.
Ajo i pagoi mashtruesit pothuajse 100,000 dollarë (rreth 86,300 euro) dhe udhëtoi deri në Shtetet e Bashkuara, ku kaloi tre javë të vetme në një dhomë hoteli duke pritur që aktori të shfaqej.
Gruaja, e identifikuar si Patricia, tha se gjithçka filloi në maj të vitit 2024, kur ndoqi profilin e Brad Pitt në Instagram dhe mori një mesazh nga dikush që pretendonte të ishte menaxheri i tij. Personi e pyeti nëse do të pranonte të fliste direkt me aktorin, dhe ajo pranoi.
Filluam të komunikonim normalisht, si dy njerëz që takohen në mënyrë të këndshme. Më pas ai më rrëfeu se ishte i dashuruar me mua,”
-tregoi Patricia për Mise Au Point.
Mashtruesi i kërkoi të mos i tregonte askujt për lidhjen dhe pretendoi se duhej të paguante për t’u takuar me Pitt.
Fillimisht, Patricia i dërgoi 50,000 dollarë (43,100 euro) në dy transaksione, më pas edhe 20,000 dollarë të tjerë (17,200 euro) për supozime shpenzimesh mjekësore.
Ai më pas e bindi që të udhëtonte për në Los Angeles, ku ajo kaloi tre javë e vetme në një hotel, duke i dërguar edhe 20,000 dollarë të tjerë (17,200 euro) para se të kthehej në Zvicër.
Vetëm pasi lexoi për një grua franceze që kishte rënë viktimë e një mashtrimi të ngjashëm duke paguar 830,000 dollarë, Patricia kuptoi se ishte mashtruar. Ajo raportoi gjithçka në polici, duke treguar se kishte humbur pothuajse 100,000 dollarë.
Është një turp i papërshkrueshëm. Kalova pothuajse një vit në një lidhje që nuk ekzistonte. Pyes veten: ‘Si mund të më kishin shfrytëzuar kaq shumë?’
-tha ajo.
Rasti tregon një tjetër shembull të mashtrimeve romantike në internet, ku persona të dobët ose të vetmuar shfrytëzohen për përfitime financiare.
