Në Maldive kanë përfunduar operacionet e kërkim-shpëtimit për nxjerrjen e trupave të zhytësve italianë të bllokuar në një shpellë nënujore, pas një operacioni të ndërlikuar nga ekipet ndërkombëtare të zhytjes.
Sot u nxorën në sipërfaqe trupat e Giorgia Sommacal dhe Muriel Oddenino, duke përmbyllur fazën e fundit të operacionit. Një ditë më parë ishin rikuperuar trupat e profesoreshës Monica Montefalcone dhe studiuesit Federico Gualtieri, ndërsa fillimisht ishte gjetur trupi i instruktorit Gianluca Benedetti.
Operacioni u krye nga zhytës finlandezë, të cilët përdorën litar udhëzues dhe skuterë nënujorë për të naviguar në thellësi rreth 47 metrash, duke ndjekur një sistem orientimi brenda shpellës dhe duke transportuar trupat në mënyrë të koordinuar deri në sipërfaqe me ndihmën e ekipeve mbështetëse të marinës maldiviane.
Autoritetet kanë nisur hetime mbi rrethanat e ngjarjes, përfshirë dyshime për përdorimin e pajisjeve jo të përshtatshme për zhytje në shpella të thella dhe mungesën e përzierjeve të posaçme të gazit për thellësi të mëdha. Prokuroria e Romës po heton për vrasje nga pakujdesia dhe pritet të kryhen autopsitë sapo trupat të kthehen në Itali, ndërsa pamjet dhe pajisjet e rikuperuara do të përdoren për të sqaruar dinamikën e plotë të ngjarjes.
