Fitorja e Argjentinës ndaj Egjiptit në Kupën e Botës 2026 është shoqëruar me polemika të forta për vendimet e arbitrit francez François Letexier. Në përfundim të takimit, trajneri i Egjiptit, Hossam Hassan, shpërtheu në protesta, duke e akuzuar gjyqtarin se favorizoi Argjentinën.
Në rrjetet sociale është publikuar edhe një video prej rreth katër minutash nga pala egjiptiane, ku analizohen disa vendime të diskutueshme të arbitrit, përfshirë faulle të pandëshkuara dhe mënyrën e administrimit të kartonëve.
Tre momentet që kanë shkaktuar më shumë debat janë penalltia e akorduar për Argjentinën, goli i anuluar i Zicos dhe goli i tretë i Argjentinës, i shënuar nga Enzo Fernández në kohën shtesë.
Penalltia për Argjentinën
Për episodin e penalltisë, shumica e analizave arbitrare janë në një mendim: vendimi ishte i drejtë. Hossan ndërhyri në mënyrë të pakujdesshme ndaj Nicolás Tagliaficos, duke futur këmbën mes këmbëve të mbrojtësit argjentinas.
Edhe pse Tagliafico nuk bëri përpjekje të mëdha për të qëndruar në këmbë, ndërhyrja u konsiderua e mjaftueshme për të akorduar penalltinë. Megjithatë, Lionel Messi nuk arriti ta shndërronte atë në gol.
Goli i anuluar i Zicos
Shumë më i diskutueshëm ishte goli i dytë i Zicos, i cili fillimisht u pranua, por më pas u anulua pas ndërhyrjes së VAR-it.
Arbitri u thirr të rishikonte pamjet për një kontakt të lehtë të Attias ndaj Lisandro Martínez gjatë rikuperimit të topit në fillim të aksionit, pranë flamurit të këndit. Pas verifikimit, Letexier vendosi të anulonte golin, një vendim që shkaktoi protesta të ashpra nga kampi egjiptian. Megjithatë, pak minuta më vonë, Zico arriti të shënonte sërish, kësaj radhe me golin që u pranua.
Dy standarde për golin e tretë?
Egjiptianët protestuan edhe për aksionin që çoi te goli i tretë i Argjentinës. Sipas tyre, Julián Álvarez rikuperoi topin ndaj Mohamed Salah me një ndërhyrje shumë të ngjashme me atë të Attias ndaj Lisandro Martínez, e cila kishte sjellë anulimin e golit të Zicos.
Në këtë rast, VAR nuk ndërhyri dhe arbitri lejoi vazhdimin e lojës, çka shtoi edhe më shumë zemërimin e skuadrës afrikane.
Kritika për arbitrin
Sipas analizave të mediave sportive, François Letexier pati një fillim të mirë të ndeshjes, por humbi kontrollin në momentet më të nxehta të pjesës së dytë. Edhe përdorimi i sistemit VAR është vënë në qendër të kritikave, pasi vendimet u konsideruan jo gjithmonë të njëjta për episode të ngjashme.
